កីឡាជាតិ
ជាតិ
AFC ព្រមានឥណ្ឌូណេស៊ី មិនឱ្យប្រើកីឡាករជាប់ពិន័យនៅស៊ីហ្គេម ក្នុង AFF U23 ហិង្សារវាងក្រុម U22 ឥណ្ឌូណេស៊ី ទល់ថៃ ក្នុងជំនួបផ្តាច់ព្រ័ត្របាល់ទាត់បុរស់ស៊ីហ្គេមលើកទី៣២នៅកម្ពុជា
× សហព័ន្ធកីឡាបាល់ទាត់អាស៊ី (AFC) ផ្ញើលិខិតព្រមានសហព័ន្ធកីឡាបាល់ទាត់ឥណ្ឌូណេស៊ី (PSSI) មិនឱ្យប្រើប្រាស់កីឡាករក្រោមអាយុ២៣ (U23) ដែលរងពិន័យនៅស៊ីហ្គេមលើកទី៣២ ក្នុងការប្រកួតជើងឯកអាស៊ីអាគ្នេយ៍ AFF U23 Championship ឆ្នាំ ២០២៣ នៅថៃឡើយ។ ឥណ្ឌូណេស៊ី ឆ្លងកាត់១ប្រកួតរួចមកហើយក្នុងពូល B ដោយចាញ់ម៉ាឡេស៊ី ១-០។
ដំបូងឡើយ PSSI បានជ្រើសរើសកីឡាករ Titan Agung និង Komang Teguh ដែលជាប់ពិន័យពីស្ថាប័ន AFC ក្រោយបង្កហិង្សានៅស៊ីហ្គេមឆ្នាំ២០២៣នៅកម្ពុជា ដើម្បីចូលរួមក្រុម U23 ឥណ្ឌូណេស៊ី ប្រកួត AFF U23 នៅថៃ ដែលចាប់ពីថ្ងៃទី ១៧-២៦ ខែសីហា។ ទោះយ៉ាងណា មុនការប្រកួតមួយថ្ងៃ ឥណ្ឌូណេស៊ី ត្រូវបាន AFC ហាមមិនឱ្យដាក់កីឡាករពីររូបនេះ និងថែមទាំងរងការព្រមានទៀតផង។
«AFC បានជូនដំណឹងទៅ PSSI រួចហើយថា ការចូលរួមរបស់ Titan Agung និង Komang Teguh ក្នុង AFF U23 មិនអាចទទួលយកបានទេ ដោយសារពួកគេនៅតែស្ថិតក្នុងបម្រាមនៅឡើយ»។ នេះជាការបញ្ជាក់របស់ AFC។
Agung និង Teguh ស្ថិតក្នុងចំណោមក្រុមកីឡាករ ៣នាក់ និងសមាជិកក្រុម៤រូបផ្សេងទៀតរបស់ U22 ឥណ្ឌូណេស៊ី ដែលរងពិន័យ ៦ប្រកួត ពី AFC បន្ទាប់ពីពួកគេចូលរួមបង្កហិសង្សាក្នុងការប្រកួតជាមួយថៃក្នុងវគ្គផ្តាច់ព្រ័ត្រស៊ីហ្គេមលើកទី៣២ កាលពីខែឧសភា នៅកីឡដ្ឋានអូឡាំពិក ក្នុងក្រុងភ្នំពេញ។ AFC ក៏បានពិន័យសមាជិករបស់ក្រុមថៃចំនួន ៧នាក់ផងដែរ។
AFC ព្រមាន PSSI ថា ទាំង Agung និង Teguh ស្ថិតនៅក្រោមការព្យួរ ដូច្នេះមិនអាចឱ្យអ្នកទាំងពីមានវត្តមាននៅ AFF U23 ជាដាច់ខាត។ ក្រោយការព្រមានរបស់ AFC ឥណ្ឌូណេស៊ីបានដក Agung និង Teguh ចេញពីបញ្ជីក្រុមរបស់ពួកគេ ដោយសល់ត្រឹមកីឡាករតែ២១នាក់ប៉ុណ្ណោះក្នុងក្រុម។
ឥណ្ឌូណេស៊ី ដែលស្ថិតក្នុងពូល B បានរងបរាជ័យមួយប្រកួតដំបូងរបស់ខ្លួនរួចមកហើយ ក្រោមថ្វីជើងម៉ាឡេស៊ីក្នុងលទ្ធផល ១-០។ ជំនួបបន្ទាប់ និងជាការប្រកួតចុងក្រោយក្នុងពូល ឥណ្ឌូណេស៊ីដែលសល់ឱកាសស្តួចស្តើងដើម្បីឡើងទៅវគ្គពាក់កណ្តាលផ្តាច់ព្រ័ត្រ AFF U23 ត្រូវបន្តជួបទីម័រខាងកើត៕
© រក្សាសិទ្ធិដោយ thmeythmey.com