សង្គមអន្តរជាតិ
អន្តរជាតិ
គ្រូបង្រៀននៅជប៉ុនលាឈប់ពីការងារ ដោយសារសុខភាពផ្លូវចិត្តកើនឡើងកម្រិតខ្ពស់ ថ្នាក់រៀននៅសាលាបឋមសិក្សាមួយកន្លែងនៅទីក្រុងតូក្យូ ។ រូបភាពពី Kyodo ។
× យោងតាមក្រសួងអប់រំជប៉ុន ក្នុងឆ្នាំសិក្សា ២០២១ មានគ្រូបង្រៀនចំនួន ៩៥៣នាក់ ដែលបម្រើការនៅគ្រឹស្ថានសិក្សារដ្ឋបានលាឈប់ពីការងារដោយសារតែសុខភាពផ្លូវចិត្ត។ តួលេខនេះបានកើនឡើងចំនួន ១៧១នាក់បើធៀបនឹងឆ្នាំ ២០១៨។
យោងតាមការស្ទង់មតិរបស់ក្រសួងអប់រំ វប្បធម៌ កីឡា វិទ្យាសាស្ត្រ និងបច្ចេកវិទ្យាជប៉ុន អ្នកដែលឈប់ពីការងារដោយសារជំងឺផ្លូវចិត្តមានចំនួន ៨ភាគរយនៃគ្រូបង្រៀនសរុបចំនួន ១២៦៥២នាក់ ។
ការស្ទង់មតិផ្ទាល់របស់ក្រសួងដែលបានចេញផ្សាយនៅចុងឆ្នាំ ២០២២ ក៏បានរកឃើញលទ្ធផលស្រដៀងគ្នាអំពីចំនួនគ្រូបង្រៀននៅសាលារដ្ឋ ដែលឈប់សម្រាកដោយសារបញ្ហាផ្លូវចិត្ត បានឈានដល់កម្រិតខ្ពស់បំផុតគឺ ៥៨៩៧នាក់ក្នុងមួយឆ្នាំសិក្សា។
ដូច្នេះបញ្ហាសុខភាពផ្លូវចិត្តរបស់គ្រូ បានក្លាយជាបញ្ហាបន្ទាន់ និងត្រូវដោះស្រាយឆាប់ៗ។ តំណាងក្រសួងអប់រំបានលើកឡើងថា ម៉ោងធ្វើការយូរ គឺជាកត្តាមួយ ដែលធ្វើឱ្យចំនួនគ្រូបង្រៀនត្រូវចាកចេញពីការងាររបស់ពួកគេ។ បើតាមកាសែតជប៉ុន Kyodo ។
ការកើនឡើងនៃបន្ទុកការងាររបស់គ្រូបង្រៀន និងការបន្ថែមម៉ោងធ្វើការ ក៏នាំឱ្យមានការថយចុះនៃចំនួនមនុស្ស ដែលចង់ក្លាយជាគ្រូបង្រៀនផងដែរ។ ដើម្បីដោះស្រាយកង្វះខាតគ្រូបង្រៀន ក្រសួងអប់រំជប៉ុនកំពុងសម្លឹងមើលការកែលម្អលក្ខខណ្ឌការងារ និងការបង្កើនចំនួនជំនួយការយ៉ាងច្រើន។
បន្ថែមពីលើហេតុផលសុខភាពផ្លូវចិត្ត ការស្ទង់មតិខាងលើបង្ហាញថា គ្រូបង្រៀនចំនួន ៤០០០នាក់បានលាឈប់ពីអាជីពមូយនេះដោយសារតែពួកគេចង់ផ្លាស់ប្តូរការងារ ហើយចំនួន ២៩១៣នាក់បានលាឈប់ដោយសារហេតុផលគ្រួសារ៕
© រក្សាសិទ្ធិដោយ thmeythmey.com