លោក ប្រាក់ សោភ័ណ បានឡើងតំណែងពីអភិបាលរងខេត្ត ទៅជាអភិបាលខេត្តសៀមរាប បន្តពីលោក ទៀ សីហា ដែលក្លាយជាឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ។ នេះបើតាមព្រះរាជក្រឹត្យ ចុះថ្ងៃទី២៣ ខែសីហា ក្រោយព្រះករុណាព្រះមហាក្សត្របានទ្រង់យល់សេចក្តីក្រាបបង្គំទូលថ្វាយរបស់លោកនាយករដ្ឋមន្ត្រី ហ៊ុន ម៉ាណែត។
លោក ប្រាក់ សោភ័ណ បានក្លាយជាអភិបាលរងខេត្តនៅខែកុម្ភៈ ឆ្នាំ២០២២ ជំនួសលោក ង៉ាន់ ភិរុណ ដែលត្រូវផ្ទេរតួនាទី និងតែងតាំងជាអគ្គារធិការដ្ឋាន នៃក្រសួងមហាផ្ទៃ។ ក្រៅពីតួនាទីជាអភិបាលរងខេត្ត លោក ប្រាក់ សោភ័ណ ដែលជាកូនប្រុសអតីតឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេស លោក ប្រាក់ សុខុន ក៏កាន់តួនាទីជាប្រធានសសយកខេត្តផងដែរ គឺបន្ទាប់ពីលោក ទៀ សីហា ជាប្រធានមុនឡើងជាអភិបាលខេត្តនៅចុងឆ្នាំ២០១៨៕