បើតាមក្រុមប្រឹក្សាទីក្រុងប៉ារីស ក្រោយពីការស៊ើប​អង្កេត​ដោយអាជ្ញាធរសាធារណៈ បានចង្អុលទៅសន្ទះលូមួយកន្លែងបានលេចធ្លាយដែលបានបិទទ្វារទឹកមិនត្រឹមត្រូវនៃប្រព័ន្ធលូបង្ហូរទឹក ជាទីកន្លែងដែលត្រូវរៀបចំកម្មវិធីប្រកួតនានាកាលសប្តាហ៍មុន។
 

«សន្ទះបិទបើកដែលការពារទឹកភ្លៀងពីការហូចូលទៅក្នុងទឹកទន្លេសែន ហាក់ដូចជាលេចធ្លាយ។»។ លោក Amelie Oudea-Castera រដ្ឋមន្ត្រីក្រសួងកីឡាបាននិយាយប្រាប់កាសែត Le Parisien បែបនេះ។ ព័ត៌មាននៃបញ្ហាលេចធ្លាយនៃប្រព័ន្ធលូបង្ហូរទឹកនេះត្រូវបានចេញផ្សាយដោយកាសែត ​Le Canard Enchaine និង Le Parisien របស់បារាំង។

កាលពីសប្តាហ៍មុន ការធ្វើតេស្តកីឡាទ្រីយ៉ាត្លុង ត្រៀមសម្រាប់ព្រឹត្តិការណ៍ Paris 2024 ត្រូវបានលុបចោល ក្រោយពីពិនិត្យឃើញថាបញ្ហានៃគុណភាពទឹកក្នុងទន្លេសែនមិនអំណោយផលសម្រាប់ការប្រកួត។ កាលពីដើមខែសីហាព្រឹត្តិការណ៍កីឡាហែលទឹកពិភពលោក Water Swimming World Cup ក៏ត្រូវបានលុបចោល បន្ទាប់ពីមានភ្លៀងធ្លាក់ខ្លាំងធ្វើឱ្យគុណភាពទឹកប្រែជាកង្វក់ និងក្រោមស្តងដារនៃសុខភាព។
 

បច្ចុប្បន្នទីក្រុងប៉ារីស បានបន្តខិតខំប្រឹងប្រែងសម្អាតទឹកក្នុងដងទន្លេសែន ដើម្បីអាចសម្រួលដល់ការប្រកួតហែលទឹកបានឡើងវិញ។ បញ្ហានេះធ្លាប់កើតឡើងដូចនៅក្នុងអំឡុងព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ ១៩០០ ផងដែរ៕