ឧប្បត្តិហេតុរត់ជាន់គ្នាបណ្តាលឱ្យមនុស្សប្រមាណ ១៣៥នាក់ ដោយរួមមានក្មេងចំនួន ៤០នាក់ កាលពីខែតុលាឆ្នាំ ២០២២ ក្នុងកីឡដ្ឋាន Kanjuruhan របស់ក្លិប Arema FC នៃលីគកំពូលឥណ្ឌូណេស៊ី បន្ទាប់ពីក្រុមប៉ូលិសការពារសុវត្ថិភាពក្នុងការប្រកួតបានបាញ់ឧស្ម័នបង្ហូរទឹកភ្នែកបំបែកហ្វូងមនុស្សចូលអុកឡុកក្នុងទីលានប្រកួត។ អ្នកគាំទ្រក្រុមម្ចាស់ផ្ទះសម្រុកចូលអុកឡុកក្នុងទីលានក្រោយក្រុមខ្លួនរងបរាជ័យលទ្ធផល ៣-២ ក្រោមថ្វីជើងក្រុមគូប្រជែងក្នុងទីក្រុង Malang ភាគខាងកើតខេត្តជ្វា តែមួយគឺក្រុម Persebaya Surabaya។
 

សាច់ញាតិជនរងគ្រោះបានសម្តែងការអស់សង្ឃឹម និងស្រក់ទឹកភ្នែក បន្ទាប់ពីតុលាការភាគខាងកើតខេត្តជ្វា បានកាត់ក្តីកាលពីខែមីនា ដើម្បីអនុញ្ញាតឱ្យមន្ត្រីប៉ូលិសដែលជាមេគ្រប់គ្រងលើផ្នែកសណ្តាប់ធ្នាប់នាការប្រកួតមានសេរីភាព។ ប៉ុន្តែឯកសាររបស់តុលាការដែលបានចែករំលែកជាមួយនឹងទីភ្នាក់ងារសារព័ត៌មាន AFP បាននិយាយថាមន្ត្រីប៉ូលិសទាំងពីររូប ដែលមានលោក Bambang Sidik Achmadi អាយុ ៤៨ឆ្នាំ និងលោក Wahyu Setyo Pranoto វ័យ ៣៥ឆ្នាំ ត្រូវបានគេរកឃើញថាមានពិរុទ្ធភាពកាលពីថ្ងៃទី២៣ ខែសីហា ពីបទធ្វេសប្រហែសបណ្តាលឱ្យមនុស្សស្លាប់និងរបួស។
 

ឯកសារបានបង្ហាញថា សេចក្តីសម្រេចបានធ្វើឡើងបន្ទាប់ពីព្រះរាជអាជ្ញាបានដាក់បណ្តឹងឧទ្ធរណ៍ដើម្បីជំទាស់នឹងការលើកលែងទោស កាលពីមុន។ លោក Achmadi ត្រូវបានកាត់ទោសជាប់ពន្ធនាគាររយៈពេល ២ឆ្នាំ ខណៈលោក Pranoto ត្រូវបានកាត់ទោសឱ្យជាប់រយៈពេល ២ឆ្នាំកន្លះ។ 
 

បើតាមការអះអាងពីសំណាក់ព្រះរាជអាជ្ញា លោក Pranoto មិនបានអើពើនឹងបទប្បញ្ញតិ្តរបស់សហព័ន្ធបាល់ទាត់អន្តរជាតិ FIFA ដែលហាមឃាត់មិនឱ្យមានការប្រើប្រាស់ឧស្ម័នបង្ហូរទឹកភ្នែកក្នុងការប្រកួតបាល់ទាត់ ខណៈដែលលោក Achmadi ត្រូវបានចោទប្រកាន់ពីបទបញ្ជាឱ្យមន្ត្រីក្រោមឱវាទរបស់លោកបាញ់ឧស្ម័នបង្ហូរទឹកភ្នែក។

 

ទោះជាយ៉ាងណាក្រុមគ្រួសារនៃជនរងគ្រោះក្នុងឧប្បត្តិហេតុរត់ជាន់គ្នាក្នុងកីឡដ្ឋាន បានបង្ហាញអារម្មណ៍មិនពេញចិត្តចំពោះការសម្រេចចិត្តដាក់ទោសពីសំណាក់តុលាការ ដោយបានចាត់ទុកថាការកាត់ទោសមានភាពធូរស្រាលពេក៕