ជាតិ
សេដ្ឋកិច្ច
លោក ថោង ខុន ផ្តាំមន្ត្រីទេសចរណ៍៖ ពេលមានការត្រូវចេះរត់រកគ្នាកុំអាងស្អីបង្ហោះហ្វេសប៊ុក លោក ខុន ថោង ទេសរដ្ឋមន្រ្តីទទួលបន្ទុកបេសកកម្មពិសេស សំណេះសំណាល ជាមួយលោក សុខ សូកេន រដ្ឋមន្ត្រីទេសចរណ៍ថ្មី និងមន្ត្រីទេសចរណ៍ប្រមាណ៤០០នាក់ ដែលធ្វើឡើងនៅទីស្តីការក្រសួង នាព្រឹកថ្ងៃទី២៥សីហា។ រូបថត៖ ក្រសួងទេសចរណ៍
× «មានការអ្វីត្រូវរត់រកគ្នាដើម្បីសួរនាំ កុំអាងស្អីបង្ហោះហ្វេសប៊ុក»។ លោក ថោង ខុន ទេសរដ្ឋមន្រ្តីទទួលបន្ទុកបេសកកម្មពិសេស បានផ្តាំបែបនេះ នៅចំពោះមុខរដ្ឋមន្ត្រី និងមន្ត្រីទេសចរណ៍ប្រមាណ៤០០នាក់ ក្នុងពិធីសំណេះសំណាលមួយដែលធ្វើឡើងនៅទីស្តីការក្រសួង នាព្រឹកថ្ងៃទី២៥សីហា។
បើតាមអតីតរដ្ឋមន្ត្រីក្រសួងទេសរចណ៍រូបនេះ ការយកបញ្ហាណាមួយទៅបង្ហោះលើហ្វេសប៊ុក គឺគ្មានផលចំណេញ ឬ រកបានដំណោះស្រាយណាល្អ ជាងការជជែកគ្នា ឬសួរនាំគ្នាដោយផ្ទាល់នោះទេ។ «បង្ហោះរឿងបែកហើយ[នៅលើហ្វេសប៊ុក] បាននាំគ្នាបកស្រាយ រឿងហ្នឹងគឺអត់ល្អទេ»។ លោក ថោង ខុន បាននិយាយយ៉ាងដូច្នេះ ហើយស្នើសុំឱ្យមន្ត្រីទេសចរណ៍គ្រប់លំដាប់ថ្នាក់ កុំធ្វើរឿងបែបនេះ ព្រោះក្រសួង គឺជាស្ថាប័នជាតិ។
សូមជម្រាបថា លោក ថោង ខុន ជារដ្ឋមន្ត្រីក្រសួងទេសចរណ៍ពីឆ្នាំ២០០៧ ដល់ថ្ងៃទី២២សីហា ឆ្នាំ២០២៣។ ពោល លោកបានកាន់តំណែងនេះចំនួន៣អាណត្តិ មុនក្លាយជាទេសរដ្ឋមន្រ្តីទទួលបន្ទុកបេសកកម្មពិសេស។ បច្ចុប្បន្ន ក្រសួងទេសចរណ៍ មាន លោក សុខ សូកេន ជារដ្ឋមន្ត្រី ដែលមានរដ្ឋលេខាធិការចំនួន២៦នាក់ និងអនុរដ្ឋលេខាធិការ១៦នាក់៕
© រក្សាសិទ្ធិដោយ thmeythmey.com