ជាតិ
សេដ្ឋកិច្ច
រដ្ឋមន្ត្រីពាណិជ្ជកម្មថ្មី សន្យាបន្តដឹកនាំថែរក្សា ក្រុមគ្រួសារពាណិជ្ជកម្មជាធ្លុងមួយ នៅគ្រប់កាលៈទេសៈ
លោកស្រី ចម និម្មល រដ្ឋមន្ត្រីថ្មីរបស់ក្រសួងពាណិជ្ជកម្ម។ រូបថត៖ MoC
×![]()
«ខ្ញុំសន្យាបន្តដឹកនាំថែរក្សា ក្រុមគ្រួសារពាណិជ្ជកម្មជាធ្លុងមួយ នៅគ្រប់កាលៈទេសៈ មានសំឡេងតែមួយ នៅលើគ្រប់សមរភូមិពាណិជ្ជកម្ម ទោះត្រជាក់ ទោះក្តៅ ទោះសមរភូមិធំឬតូច»។ រដ្ឋមន្ត្រីពាណិជ្ជកម្មថ្មី លោកស្រី ចម និម្មល បានអះអាងបែបនេះចំពោះ លោក ប៉ាន សូរស័ក្តិ អតីតរដ្ឋមន្ត្រីពាណិជ្ជកម្ម និងមន្ត្រីរាជការក្រសួងពាណិជ្ជកម្ម នាថ្ងៃទី២៥សីហា។
ក្នុងពិធីសំណេះសំណាលជាមួយថ្នាក់ដឹកនាំ និងមន្ត្រីរាជការក្រសួងពាណិជ្ជកម្ម លោកស្រី ចម និម្មល បានថ្លែងអំណរគុណ និងអបអរសាទរចំពោះ លោក ប៉ាន សូរស័ក្តិ សមាជិករដ្ឋសភា និងទទួលយកគំរូវីរភាព តាមរយៈស្នាដៃ និងសមិទ្ធផល ដែលសម្រេចបានក្នុងអាណត្តិកន្លងមក។ លោកស្រី បញ្ជាក់ថា សមិទ្ធផលទាំងនេះ បានក្លាយជាមូលដ្ឋានគ្រឹះ និង ផែនទីបង្ហាញផ្លូវដ៏រឹងមាំសម្រាប់ក្រសួងពាណិជ្ជកម្ម យកទៅត្រងត្រាប់និងអនុវត្តបន្ត ដើម្បីអាចសម្រេចបាននូវសមិទ្ធផលធំៗថ្មីបន្ថែមទៀត ជូនដល់រាជរដ្ឋាភិបាលក្នុងនីតិកាលទី៧ នៃរដ្ឋសភា។
រដ្ឋមន្ត្រីពាណិជ្ជកម្មថ្មី លោកស្រី ចម និម្មល ឈរថតរូបជាមួយ លោក ប៉ាន សូរ ស័ក្តិ សមាជិក រដ្ឋសភា និង ជាអតីតរដ្ឋមន្ត្រីក្រសួងពាណិជ្ជកម្ម។ រូបថត៖ MoC
នាឱកាសនោះ លោក ប៉ាន សូរស័ក្តិ សមាជិករដ្ឋសភា និងជាអតីតរដ្ឋមន្ត្រីក្រសួងពាណិជ្ជកម្ម ក៏បានអំណរគុណចំពោះការលះបង់ និងកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការទាំងអស់នៃក្រសួងពាណិជ្ជកម្ម ព្រមទាំងក្រសួង-ស្ថាប័នពាក់ព័ន្ធ ដែលបានរួមចំណែកសម្រេចបាននូវជោគជ័យទាំងឡាយ នាអាណត្តិរាជរដ្ឋាភិបាលកន្លងមក ផងដែរ។
លោកស្រី ចម និម្មល ដែលត្រូវបានគេស្គាល់ថា គឺជាតំណាងរាស្ត្រស្ត្រីដែលមានវ័យក្មេងជាងគេបំផុតក្នុងចំណោមឥស្សរជនស្ត្រីផ្សេងទៀត ដែលបានជាប់ជាតំណាងរាស្ត្រសម្រាប់អាណត្តិទី៧។ លោកស្រី គឺជាកូនស្រីបង្កើតរបស់លោកទេសរដ្ឋមន្ត្រី ចម ប្រសិទ្ធ អតីតរដ្ឋមន្ត្រីក្រសួងឧស្សាហកម្ម និងសិប្បកម្ម៕
Tag:
ពាណិជ្ជកម្ម
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
6 ថ្ងៃ
