ក្លិប Inter Miami នៃលីគកីឡាបាល់ទាត់កំពូលអាម៉េរិក (MLS) បានប្រកាសបញ្ចូលឈ្មោះ Thiago Messi កូនប្រុសច្បងរបស់ខ្សែប្រយុទ្ធ Lionel Messi ទៅក្នុងបញ្ជីឈ្មោះក្រុមឈុតយុវជនអាយុក្រោម ១២ឆ្នាំ សម្រាប់រដូវកាល ២០២៣-២៤។
ក្រុមយុវជនរបស់ក្លិប Miami ត្រូវប្រកាសនៅថ្ងៃទី២៧ ខែសីហា ដោយមានកីឡាករសរុបប្រមាណ ១៥០នាក់ សម្រាប់ ៧ក្រុមយុវជនផ្សេងគ្នា ទៅតាមកម្រិតនៃអាយុនីមួយៗ។ ក្រុមយុវជនរបស់ក្លិបមានចាប់ពី U12 ដល់ U19 ដែលហ្វឹកហាត់នៅក្នុងមជ្ឈមណ្ឌលបាល់ទាត់ Florida Blue ហើយកីឡាករចំណូលថ្មីចំនួន ៣៥រូប ចំណោម ១៥០រូប ត្រៀមសម្រាប់រដូវកាលថ្មី។
ស្ថិតក្នុងការប្រកាសនូវបញ្ជីឈ្មោះដ៏អស្ចារ្យរបស់ក្លិប Inter Miami ក្នុងចំណោមនោះគឺកូនប្រុសច្បងរបស់ Lionel Messi ដែលជួយអាហ្សង់ទីនឈ្នះជើងឯក FIFA World Cup 2022 ក៏មានវត្តមានក្នុងក្រុមU12 ផងដែរ។
«យើងបានសម្លឹងឆ្ពោះទៅមុខសម្រាប់រដូវកាលថ្មីដ៏អស្ចារ្យ បន្ទាប់ពីទទួលបានភាពជោគជ័យនៃរដូវកាល ២០២២-២៣។ គម្រោងនៃការអភិវឌ្ឍយុវជនកំពុងមានសក្តានុពល និងការរួមចំណែកពង្រឹងយុវជនទាំង ៦ កម្រិតរបស់យើងរហូតដល់ក្រុមធំ។»។ នេះបើតាមការប្រកាសរបស់ក្លិប Inter Miami។
ក្រុមយុវជនអាយុក្រោម ១២ឆ្នាំ មាន Thiago កូនប្រុសច្បងរបស់ Messi នឹងចូលរួមប្រកួតប្រជែងក្នុងវិស័យបាល់ទាត់ក្នុងក្របខណ្ឌលីគយុវជន Florida Academy។
ក្រុម U12 របស់ក្លិប Inter Miami រួមមានកីឡាករយុវជនចំណូលថ្មីដូចជា ៖ Bautista Apablaza, Rylan Hand, Jelove Lundy, Jacob Mascarena, Thiago Messi, Kevin O’Donovan, Ammar Osman, Matias Rodriguez និង Romeo Rodrigues។
Thiago ដែលមានអាយុក្រោម ១០ឆ្នាំ កូនប្រុស Messi និងអ្នកស្រី Antonela Roccuzzo បានកើតនៅថ្ងៃទី២ ខែវិច្ឆិការ ឆ្នាំ ២០១២ នៅក្នុងទីក្រុង Barcelona។ Thiago ទើបតែសម្រេចចូលលេងបាល់ទាត់នៅក្លិបដែលឪពុកគេកំពុងប្រកបអាជីព ដោយពីមុនមករូបគេមិនដែលស្ថិតក្រោមឈុតយុវជនរបស់ក្លិបណាមួយឡើយ។
Messi ជាមួយនឹងប្រពន្ធមានកូនប្រុសចំនួន ៣រូប ដោយមាន Thiago ជាបងប្រុស Mateo និង Ciro បានធ្វើដំណើរមកកាន់ទីក្រុង Miami ក្រោយចាកចេញពីក្រុម Paris Saint Germain បន្ទាប់ពីលេងនៅបារាំងរយៈពេល ២ឆ្នាំ៕