លោកនាយករដ្ឋមន្ត្រី ហ៊ុន ម៉ាណែត បាននិយាយទៅកាន់សមាជិករដ្ឋភិបាលទាំងអស់ឲ្យផ្តល់អាទិភាពលើការងារនៅស្ថាប័នរៀងៗខ្លួន បើក្នុងករណីចាំបាច់ មិនបាច់បង្ហាញវត្តមាននៅក្នុងកម្មវិធីដែលលោកធ្វើជាអធិបតីភាពនោះឡើយ។

 

ថ្លែងក្នុងពិធីសំណេះសំណាលជាមួយកម្មករ និយោជិតជិត២ម៉ឺននាក់នៅក្រុងតាខ្មៅ ខេត្តកណ្តាល លោក ហ៊ុន ម៉ាណែត ក៏បានស្នើផងដែរទៅកាន់បណ្តារដ្ឋមន្ត្រី បើក្នុងករណីមានកិច្ចការចាំបាច់ផ្ទាល់ខ្លួន អាចចាត់តាំងរដ្ឋលេខាធិការប្រចាំការ ឬរដ្ឋលេខាធិការណាមួយឲ្យចូលរួមជំនួស និងរង់ចាំឆ្លើយសំណួររបស់លោក។

 

ទោះបីជាយ៉ាងណាក៏ដោយ លោកនាយករដ្ឋមន្ត្រី បានបញ្ជាក់ថា វត្តមានបណ្តាសមាជិករដ្ឋាភិបាលទាំងអស់ក្នុងកម្មវិធីរបស់លោក គឺជាការបង្ហាញនូវសាមគ្គីភាព និងការរួមគ្នាយកចិត្តទុកដាក់លើការបម្រើប្រជាពលរដ្ឋ៕