ឆាប់ៗខាងមុខនេះ រដ្ឋាភិបាលថៃថ្មី នឹងចាប់ផ្តើមការងារ។ គណៈរដ្ឋមន្រ្តីថ្មី ត្រូវបានរំពឹងថា នឹងបើកកិច្ចប្រជុំលើកដំបូង នៅថ្ងៃទីថ្ងៃទី១២ ខែកញ្ញា ក្រោយការតែងតាំង និងស្បថនៅចំពោះមុខព្រះមហាក្សត្រ។ 

 

ពីទីស្នាក់ការកណ្តាលបក្សភឿថៃ នៅថ្ងៃទី១ ខែកញ្ញា លោកសេដ្ឋា ថាវីស៊ីន នាយករដ្ឋមន្រ្តីថៃ បានប្រាប់លោកប្រាយុទ្ធ ចន្ទអូចា ឱ្យរីករាយក្នុងជីវិតតាមរយៈការធ្វើដំណើរទៅបរទេស។ 

 

ទន្ទឹមនេះ លោកសេដ្ឋា បានបញ្ជាក់ថា បញ្ជីគណៈរដ្ឋមន្រ្តីថៃ នឹងបញ្ជូនទៅព្រះមហាក្សត្រ ដើម្បីសុំការតែងតាំងនៅថ្ងៃទី១ ខែកញ្ញានេះ ប្រសិនបើក្រុមប្រឹក្សារដ្ឋថៃ ត្រួតពិនិត្យពីសមាសភាពរបស់សមាជិកគណៈរដ្ឋមន្រ្តីរួចរាល់។ នេះបើតាមការចុះផ្សាយរបស់សារព័ត៌មាន Khaosod English។ 

 

លោកសេដ្ឋាក៏បានលើកឡើងពីការស្នើសុំលើកលែងទោសរបស់លោក ថាក់ស៊ីន ស៊ីណាវ៉ាត់ អតីតនាយករដ្ឋមន្រ្តីថៃផងដែរ ដោយប្រមុខរដ្ឋាភិបាលថ្មីចាត់ទុកបញ្ហានោះ ជាកិច្ចការផ្ទាល់ខ្លួនរបស់លោកថាក់ស៊ីនសុទ្ធសាធ។ 

 

កន្លងមក លោក ប្រាយុទ្ធ បានបញ្ជាក់ប្រាប់អ្នកសារព័ត៌មានថា លោកនឹងក្លាយជាពលរដ្ឋសាមញ្ញដោយគ្មានឯកសិទ្ធិពិសេស ហើយចង់សម្រាក និងចំណាយពេលជាមួយគ្រួសារ។

 

ក្នុងជំនួបនៅវិមានរដ្ឋាភិបាលនៅពេលកន្លងមក លោកប្រាយុទ្ធ បានផ្តល់អនុសាសន៍ឱ្យលោកសេដ្ឋាមានភាពអំណត់ក្នុងការដឹកនាំ រួមទាំងប្រកាន់យកគោលការណ៍ «ជាតិ, សាសនា និងព្រះមហាក្សត្រ»។ លោកសេដ្ឋាថា លោកប្រាយុទ្ធ ជាបុគ្គលមួយរូប ដែលគួរតែទទួលបានការគោរព។ 

 

តាមការចុះផ្សាយរបស់សារព័ត៌មានបាងកកប៉ុស្តិ៍ លេខាធិការដ្ឋានគណៈរដ្ឋមន្រ្តីថៃ បានបញ្ជូនបញ្ជីគណៈរដ្ឋមន្រ្តី ទៅមហាក្សត្រថៃហើយ ដើម្បីសុំការតែងតាំង មុននឹងស្បថចូលកាន់តំណែង។ ការបញ្ជូននេះ ធ្វើឡើងក្រោយក្រុមប្រឹក្សារដ្ឋថៃ បានពិនិត្យរួចរាល់ពីសមាសភាពនៃគណៈរដ្ឋមន្រ្តី ដោយមិនបានរកឃើញមានបញ្ហា។ 

 

ក្រោយសេចក្តីថ្លែងការណ៍ស្តីពីគោលនយោបាយថ្មី​ ត្រូវបានរៀបចំរួចរាល់ លោកសេដ្ឋា នឹងជូនដំណឹងទៅប្រធានរដ្ឋសភា លោក Wan Muhammad Nor Matha ដែលជាអ្នកកោះប្រជុំសមាជិករដ្ឋសភាទាំងអស់។ 

 

បើសិនបើគ្មានការប្រែប្រួលទេ រដ្ឋាភិបាលថៃថ្មីគ្រោង ថ្លែងពីគោលនយោបាយរបស់ខ្លួនទៅកាន់សភា នៅថ្ងៃទី៨ ខែកញ្ញា ហើយគណៈរដ្ឋមន្រ្តីថ្មី អាចបើកកិច្ចប្រជុំលើកដំបូង នៅប៉ុន្មានថ្ងៃបន្ទាប់៕