មុននឹងចាកចេញទៅចូលរួមកិច្ចប្រជុំកំពូលអាស៊ានលើកទី៤៣ និងកិច្ចប្រជុំពាក់ព័ន្ធ នៅក្រុងហ្សាការតា ឥណ្ឌូណេស៊ី លោក យូន សុកយ៉ល បានផ្តល់កិច្ចសម្ភាសសំណេរជាមួយសារព័ត៌មាន ឥណ្ឌូណេស៊ី Kompas ដែលចេញនៅថ្ងៃទី៥ ខែកញ្ញា។ ក្នុងកិច្ចសម្ភាសនោះ លោកយូន បានព្រមានពីការគំរាមកំហែងរបស់កូរ៉េខាងជើង តាមរយៈកម្មវិធីមីស៊ីល និងនុយក្លេអ៊ែរលើអាស៊ាន។ បន្ថែមពីនេះ មេដឹកនាំកូរ៉េខាងត្បូង ក៏បានអំពាវនាវឱ្យមានកិច្ចសហប្រតិបត្តិការ ដើម្បីដាក់សម្ពាធលើកូរ៉េខាងជើងផង។ 

 

«ការកើនឡើងនៃការគំរាមកំហែងមីស៊ីល និងអាវុធនុយក្លេអ៊ែរ បានបង្កហានិភ័យដោយផ្ទាល់លើបណ្តាប្រទេសអាស៊ាន»។ ប្រធានាធិបតីកូរ៉េខាងត្បូង បានសង្កត់ធ្ងន់បែបនេះ ដោយបន្តជំរុញឱ្យរដ្ឋអាស៊ានមានការបង្រួបបង្រួម ដើម្បីឆ្លើយតបនឹងការគំរាមកំហែងនោះ ដោយភ្ជាប់ជាមួយគោលដៅនៃការំសាយកម្មវិធីអាវុធនុយក្លេអ៊ែររបស់កូរ៉េខាងជើង។ 

 

ក្នុងកិច្ចសម្ភាសដដែលនោះ ប្រមុខរដ្ឋកូរ៉េខាងត្បូងរូបនេះ បានបញ្ជាក់ជាថ្មីពីភាពចាំបាច់នៃការថែរក្សាសន្តិភាព និងស្ថិរភាពនៅក្នុងតំបន់ឥណ្ឌូ-ប៉ាស៊ីហ្វិក ដែលពាក់ព័ន្ធនឹងសន្តិភាពសកលលោក។ ជុំវិញបញ្ហានេះ លោកយូន បានទទូចឱ្យបន្តពង្រឹងកិច្ចសហប្រតិបត្តិការរវាងអាស៊ាន​ និងជប៉ុន ចិន និងកូរ៉េខាងត្បូង ដើម្បីដោះស្រាយបញ្ហាលើឧបទ្វីបកូរ៉េ។ 

 

សូមបញ្ចាក់ថា កូរ៉េខាងត្បូង បានចាត់ទុកអាស៊ាន ជាដៃគូដ៏សំខាន់ទាំងផ្នែកពាណិជ្ជកម្ម កិច្ចសហប្រតិបត្តិការ និងលើវិស័យផ្សេងទៀត។ នៅឆ្នាំក្រោយ ភាពជាដៃគូសន្ទនារវាងអាស៊ាន និងកូរ៉េខាងត្បូង នឹងឈានចូលដល់ខួប ៣៥ឆ្នាំ។ ភាពជាដៃគូយុទ្ធសាស្រ្តរវាងភាគីទាំងពីរ ត្រូវបានបង្កើតឡើងនៅក្នុងឆ្នាំ ២០១០។ នៅក្នុងឆ្នាំ២០២៤ កូរ៉េខាងត្បូង ស្វះស្វែងរកការដំឡើងរកភាពជាដៃគូយុទ្ធសាស្រ្តគ្រប់ជ្រុងជ្រោយ (CSP) ជាមួយអាស៊ានបន្ថែមទៀត៕