កិច្ចប្រជុំកំពូលអាស៊ានលើកទី៤៣ បានចាប់ផ្តើមបើកជាផ្លូវការហើយ នៅព្រឹកថ្ងៃទី៥ ខែកញ្ញា ដោយមេដឹកនាំនៃបណ្តាប្រទេសអាស៊ាន លើកលែងតែមីយ៉ាន់ម៉ា បានមកជួបជុំគ្នា ដើម្បីពិភាក្សាពីបញ្ហាប្រឈមនៅក្នុងតំបន់ និងពិភពលោក។ ក្នុងសុន្ទរកថាបើកកិច្ចប្រជុំ លោកចូកូ វីដូដូ ប្រធានាធិបតីឥណ្ឌូណេស៊ី និងជាប្រធានផ្លាស់វេនអាស៊ានឆ្នាំ២០២៣ បានទទូចឱ្យអាស៊ាន និងប្រទេសជាដៃគូស្វះស្វែងរកកិច្ចសហប្រតិបត្តិការជាជាង ការប្រកួតប្រជែង។ 

 

«កុំប្រែក្លាយអាស៊ានទៅជាវេទិកាសម្រាប់ការប្រកួតប្រជែង ដែលបង្កឱ្យមានការខូចខាតទៅវិញទៅមក។ ផ្ទុយទៅវិញ ត្រូវប្រែក្លាយអាស៊ាន ជាវេទិកាសម្រាប់កិច្ចសហប្រតិបត្តិការ ដើម្បីសម្រេចបានវិបុលភាព, ស្ថិរភាព និងសន្តិភាព»។ លោកចូកូ បានសង្កត់ធ្ងន់បែបនេះ។ 

 

ទន្ទឹមនេះ មេដឹកនាំឥណ្ឌូណេស៊ី បានបញ្ជាក់ផងដែរថា​ រដ្ឋអាស៊ាន បានឯកភាពក្នុងការបដិសេធ មិនធ្វើជាកូនអុករបស់បណ្តាប្រទេសមហាអំណាចណាមួយឡើយ។ 

 

កន្លងមក អាស៊ាន ត្រូវបានអ្នកជំនាញមើលឃើញថា ជាទីតាំងនៃការប្រកួតប្រជែងរវាងអាម៉េរិក និងចិន។ អាម៉េរិក តែងបង្ហាញពីជំហរគាំទ្ររដ្ឋអាស៊ាន ពាក់ព័ន្ធនឹងសមុទ្រចិនខាងត្បូងប្រឆាំងនឹងចិន។ 

 

ការលើកឡើងរបស់ប្រមុខរដ្ឋឥណ្ឌូណេស៊ីរូបនេះ ធ្វើឡើងមុនពេលកិច្ចប្រជុំអាស៊ីបូព៌ា និងកិច្ចប្រជុំសំខាន់ៗផ្សេងទៀត ដែលអាម៉េរិក រួមទាំងសម្ព័ន្ធមិត្ត អាចប៉ះសម្តីគ្នាជាមួយចិនទាក់ទិននឹងការបញ្ចេញផែនទីថ្មីលើសមុទ្រចិនខាងត្បូង កោះតៃវ៉ាន់ និងការបញ្ចេញទឹក ដែលបន្សុទ្ធរួចពីរោកចក្រថាមពលនុយក្លេអ៊ែររបស់ជប៉ុនផង។  

 

ក្នុងកិច្ចប្រជុំមេដឹកនាំអាស៊ានលើកនេះ ប្រធានបទជាច្រើននឹងត្រូវលើកយកទៅពិភាក្សា ក្នុងនោះមាន វិបត្តិនយោបាយនៅមីយ៉ាន់ម៉ា, សន្តិសុខស្បៀង, បម្រែបម្រួលអាកាសធាតុ បញ្ហាសមុទ្រចិនខាងត្បូង និងឧក្រិដ្ឋកម្មឆ្លងព្រំដែនជាដើម៕