ជាតិ
សេដ្ឋកិច្ច
កម្ពុជា-ហ្វីលីពីន រួមគ្នាអភិវឌ្ឍវិស័យកសិកម្ម និងសហគ្រាសមីក្រូ ធុនតូច និងមធ្យម
×![]()
កម្ពុជា សម្រេចចាប់ដៃគូជាមួយប្រទេសហ្វីលីពីន ដើម្បីអភិវឌ្ឍវិស័យកសិកម្ម និងសហគ្រាសមីក្រូ ធុនតូច និងមធ្យម(MSMEs)។ អនុស្សរណៈ នៃការយោគយល់គ្នាលើភាពជាដៃគូនេះ ត្រូវបានចុះហត្ថលេខា រវាងលោក គិត ម៉េង ប្រធានសភាពាណិជ្ជកម្មកម្ពុជា និង លោក ចូហ្សេ ម៉ា អេ ខនសិបសិន ប្រធានក្រុមប្រឹក្សាពិគ្រោះយោបល់ធុរកិច្ច អាស៊ាន សម្រាប់ហ្វីពីលីន នៅទីក្រុងហ្សាការតា ប្រទេសឥណ្ឌូនេស៊ី នាថ្ងៃទី៥កញ្ញា។ 
បើតាមការចុះផ្សាយរបស់សភាពាណិជ្ជកម្មកម្ពុជា ភាពជាដៃគូជាមួយប្រទេសហ្វីលីពីននេះ គឺផ្តោតជាសំខាន់ទៅលើការលើកកម្ពស់វិស័យកសិកម្ម និងការជំរុញកាលានុវត្តភាពកសិ-ពាណិជ្ជកម្ម ប្រកបដោយចីរភាព។ សភាពាណិជ្ជកម្មកម្ពុជា បានបញ្ជាក់ថា ភាគីនៃប្រទេសទាំងពីរបានយកចិត្តទុកដាក់ជាខ្លាំង លើការពិនិត្យលទ្ធភាពរួមគ្នាចំនួន៤ចំណុច។ ក្នុងនោះមាន ចំណុចទីមួយ៖ គឺការសិក្សាពីលទ្ធភាពបង្កើតច្រកបង្រៀន អំពីកសិកម្មប្រកបដោយសក្តានុពល បច្ចេកវិទ្យាកសិកម្ម សន្តិសុខស្បៀង ម៉ូឌែលធុរកិច្ច កសិសហគ្រិន និងការអភិវឌ្ឍខ្សែច្រវ៉ាក់តម្លៃ របស់កសិករ សហគ្រាស និង ស្ថាប័នរដ្ឋ ទាំងតូច មធ្យម និងធំ។
ចំណុចទីពីរ៖ ការកំណត់នូវតម្រូវការធុរកិច្ច ដើម្បីអភិវឌ្ឍកាលានុវត្តភាព ពាណិជ្ជកម្ម និងវិនិយោគក្នុងវិស័យស្រូវអង្ករ និងផលិតផល រួមទាំងសេវាកម្មកសិកម្មផ្សេងទៀត។ ចំណុចទីបី៖ ការលើកកម្ពស់ការស្រាវជ្រាវ និងអភិវឌ្ឍន៍ស្រូវអង្ករ។
រីឯចំណុចទីបួន៖ គឺការជំរុញយុទ្ធសាស្រ្តប្រកបដោយប្រសិទ្ធភាព ក្នុងការដោះស្រាយបញ្ហាប្រែប្រួលអាកាសធាតុ និងធានានូវបរិយាកាស កសិធុរកិច្ចប្រកបដោយចីរភាព។
សូមជម្រាបថា កិច្ចសហការរវាងវិស័យឯកជនខាងលើនេះ ត្រូវបានធ្វើឡើងក្រោមវត្តមាន សម្តេចនាយករដ្ឋមន្ត្រី ហ៊ុន ម៉ាណែត ជាមួយលោក FERDINAND "BONGBONG" ROMUALDEZ MARCOS JR. ប្រធានាធិបតីហ្វីលីពីន នាឱកាសចូលរួមកិច្ចប្រជុំកំពូលអាស៊ានលើកទី៤៣ និងកិច្ចប្រជុំពាក់ព័ន្ធនានា នៅក្នុងទឹកដីនៃសាធារណរដ្ឋឥណ្ឌូនេស៊ី៕
Tag:
ពាណិជ្ជកម្ម
កសិកម្ម
SMEs
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
