រាល់វីដេអូដែល ចែ លាភ បានផលិត និងបង្ហោះចេញលើបណ្ដាញសង្គមម្ដងៗ មានអ្នកចូលចិត្ត និងទស្សនាជាច្រើនរាប់ពាន់ រាប់លាននាក់ ព្រោះជាមាតិកាមានប្រយោជន៍ដល់សុខភាព ម្តាយទារក ក៏ដូចជារបៀបធ្វើម្ហូបអាហារ និង Food Reviews ក៏ដូចជាក្រុមគ្រួសាររីករាយ។ 
 

ជាក់ស្តែង គិតមកទល់ពេលនេះ សម្រាប់គណនី TikTok របស់ផលិតកររូបនេះ ដែលមានឈ្មោះ “Miss Food 10”  មានអ្នកតាមដាន (Follower) រហូតទៅដល់ ១.៤លាននាក់ និងLike ៧៣.៧លាន ដែលជាចំនួនមួយដ៏ច្រើនលើសលប់ផងដែរ។ ចំណែកគណនីហ្វេសប៊ុកវិញ មានអ្នកតាមដាន រហូតដល់ ២២៩ ពាន់នាក់ និងអ្នកចូលទស្សនាវីដេអូជាមធ្យម ១០០ ពាន់ដង។ 
  

ដើមចមដែលជំរុញឲ្យ ចែ លាភ ហៅ Miss Food ចាប់ផ្តើមអាជីពអ្នកផលិតមាតិកាវីដេអូ លើបណ្តាញសង្គម ដោយសារតែជាចំណង់ចំណូលចិត្តផ្ទាល់ខ្លួន ហើយក៏ជាក្តីស្រមៃចង់ក្លាយនខ្លួនជា Content Creator ចែករំលែកនូវចំណេះដឹង បទពិសោធន៍ ទាក់ទងនឹង របៀបធ្វើម្ហូបអាហារសុខភាព មាតាទារក និងវិធីធ្វើឲ្យគ្រួសារមានសុភមង្គល។ 

 

ចែ លាភ បាននិយាយថា៖ “ខ្ញុំគិតថា នេះគឺជាសម័យ គេពេញនិយម មាតិកាវីដេអូ អាស្រ័យហេតុនេះ ប្រសិនបើចង់ល្បី មានអ្វីទៅពិបាក ដោយគ្រាន់តែសម្លឹងមើលតម្រូវការមហាជន ថាពួកគាត់ចូលចិត្តអ្វី ហើយចង់បានមាតិកាបែបណា អាស្រ័យហេតុនេះ យើងត្រូវផលិតវីដេអូឲ្យចំគោលដៅរបស់ពួកគាត់”។ 
  

សូមបញ្ជាក់ផងដែរថា ចែ លាភ ហៅ Miss Food មានឈ្មោះពិត សៅ រតនា ហើយបច្ចុប្បន្ន កំពុងផ្ទុះការគាំទ្រខ្លាំង រហូតអាចក្លាយជា Content Creator ដ៏មានប្រជាប្រិយភាពមួយរូប។ ដូចឃើញស្រាប់ មានក្រុមហ៊ុនជាច្រើនដូចជា ម្សៅទឹកដោះគោ ម៉ាស៊ីនបូមទឹកដោះ ប្រ៊េនចំណីអាហារល្បីនានា កំពុងបណ្តាក់គ្នាផ្សព្វផ្សាយផលិតផលក៏ដូចជាប្រ៊េនរបស់ខ្លួន តាមរយៈមាតិកាវីដេអូរបស់អ្នកនាងផងដែរ។ 
 

ក្រៅពីនេះ សៅ រតនា តែងតែចូលរួមសកម្មភាពសប្បុរសធម៌ តាមរយៈការជួយដល់កុមារកំព្រា ប្រជាជនក្រីក្រ មនុស្សចាស់ជរា  និង មន្ទីរពេទ្រគន្ធបុប្ផាជាដើម៕