អន្តរជាតិ
របាយការណ៍៖ ចិនហាមមន្ត្រីរដ្ឋាភិបាលមិនឱ្យប្រើទូរស័ព្ទ iPhone នៅកន្លែងធ្វើការងារ
× កាសែត Wall Street Journal (WSJ) បានរាយការណ៍នាថ្ងៃទី៦ ខែកញ្ញាថា ចិនបានបញ្ជាឱ្យ មន្ត្រីនៅតាមទីភ្នាក់ងាររដ្ឋាភិបាលមិនឱ្យប្រើប្រាស់ទូរស័ព្ទដៃ iPhone របស់ក្រុមហ៊ុន Apple និងទូរស័ព្ទដៃម៉ាកបរទេសផ្សេងៗទៀតសម្រាប់ការធ្វើការងារ ឬយកចូលទៅក្នុងការិយាល័យនោះឡើយ។ បញ្ជានេះ ត្រូវបានដាក់ចេញនៅពេលថ្មីៗនេះប៉ុណ្ណោះ។
បើតាម WSJ ការហាមប្រាមនេះ ធ្វើឡើងក្នុងក្រុមតាមបណ្ដាញសង្គម ឬក្នុងកិច្ចប្រជុំ។ការហាមប្រាមនេះក៏ធ្វើឡើងមុនព្រឹត្តិការណ៍ក្រុមហ៊ុន Apple នៅសប្តាហ៍ក្រោយដែលនឹងចេញលក់ទូរស័ព្ទ iPhone ស៊េរីថ្មី។ របាយការណ៍ WSJ មិនបានបញ្ចេញឈ្មោះក្រុមហ៊ុនផលិតទូរស័ព្ទផ្សេងទៀតក្រៅពី Apple ដែលនឹងត្រូវបានហាមឃាត់នោះទេ។
នេះមិនមែនជាលើកដំបូងឡើងដែលចិនហាមផលិតផលបរទេសចូលទីតាំងរដ្ឋាភិបាល។ ក្នុងឆ្នាំ២០២២ ក្រសួងចិនខ្លះក៏ហាមមន្រ្តីយកឡាន Tesla ចូលទៀតផង។
តាមពិតទៅ ចិនកំពុងព្យាយាមកាត់បន្ថយការពឹងផ្អែកលើបច្ចេកវិទ្យាបរទេស ហើយពង្រឹងផលិតផលក្នុងស្រុកវិញ ស្របពេលដែលទំនាក់ទំនងជាមួយអាម៉េរិកមិនសូវល្អ។
ភាពតានតឹងរវាងចិន និងអាម៉េរិកបានកើនឡើងខ្ពស់នៅពេលដែលទីក្រុងវ៉ាស៊ីនតោនធ្វើការជាមួយសម្ព័ន្ធមិត្តដើម្បីរារាំងចិនប្រើប្រាស់ឧបករណ៍សំខាន់ៗដូចជាបន្ទះឈីបជាដើម ខណៈទីក្រុងប៉េកាំងដាក់កម្រិតលើក្រុមហ៊ុនល្បីៗរបស់អាម៉េរិករួមទាំងក្រុមហ៊ុនផលិតយន្តហោះ Boeing និងក្រុមហ៊ុនបន្ទះឈីប Micron Technology។
ចិន ជាទីផ្សារដ៏ធំបំផុតមួយរបស់ក្រុមហ៊ុន Apple និងមានចំណែកជិតមួយភាគប្រាំនៃប្រាក់ចំណូលក្រុមហ៊ុនសរុប៕
© រក្សាសិទ្ធិដោយ thmeythmey.com