ជាតិ
សេដ្ឋកិច្ច
ស្ថាបនិកវេទិកាសេដ្ឋកិច្ចពិភពលោក៖ កម្ពុជាមានសក្តានុពល ហើយសេដ្ឋកិច្ចរីកលូតលាស់យ៉ាងប្រសើរ
លោក ក្លូស ស្វប់ ស្ថាបនិកវេទិកាសេដ្ឋកិច្ចពិភពលោក (ឆ្វេង)ចាប់ដៃជាមួយ សម្តេច ហ៊ុន ម៉ាណែត ក្នុងជំនួបទ្វេភាគី នាឱកាសចូលរួមកិច្ចប្រជុំកំពូលអាស៊ានលើកទី៤៣ និងកិច្ចប្រជុំពាក់ព័ន្ធ នៅទីក្រុងហ្សាការតា ប្រទេសឥណ្ឌូណេស៊ី នាថ្ងៃទី៦កញ្ញា។ ។
×![]()
កម្ពុជា គឺមានសក្តានុពល និងមានសេដ្ឋកិច្ចកំពុងរីកលូតលាស់ទៅមុខយ៉ាងល្អប្រសើរ។ នេះជាការកត់សម្គាល់របស់លោក ក្លូស ស្វប់ (Klaus Schwab) ស្ថាបនិក និងជាប្រធានប្រតិបត្តិវេទិកាសេដ្ឋកិច្ចពិភពលោក (World Economic Forum)។ 
ស្ថាបនិក WEF បានលើកឡើងបែបនេះនៅចំពោះមុខសម្តេចនាយករដ្ឋមន្ត្រីហ៊ុន ម៉ាណែត ក្នុងអំឡុងកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធ នៅរដ្ឋធានីហ្សាការតា ប្រទេសឥណ្ឌូណេស៊ី នាថ្ងៃទី៦កញ្ញា។ យោងតាមលទ្ធផលនៃជំនួបនេះ លោកក្លូស ស្វប់ បានថ្លែងថា ៖ «តាមរយៈការចូលរួមរបស់ខ្ញុំក្នុងកិច្ចប្រជុំកំពូលអាស៊ាននៅកម្ពុជាកាលពីឆ្នាំមុន[ឆ្នាំ២០២២] ខ្ញុំបានកត់សម្គាល់និងវាយតម្លៃខ្ពស់ចំពោះកម្ពុជា ជាប្រទេសដែលមានសក្តានុពល និង កំពុងរីកលូតលាស់ទៅមុខយ៉ាងល្អប្រសើរ »។
លើសពីនេះ លោកក្លូស ស្វប់ ក៏ប្រាប់ប្រមុខរដ្ឋាភិបាលកម្ពុជា ពីគោលបំណងដែលស្ថាប័នវេទិកាសេដ្ឋកិច្ចពិភពលោក ចង់បង្កើនកិច្ចសហប្រតិបត្តិការ នៅក្នុងតំបន់អាស៊ាន ដែលរួមមានកម្ពុជា ផងដែរ។
ជាការឆ្លើយតប សម្តេច ហ៊ុន ម៉ាណែត បានលើកឡើងថា គោលដៅរបស់វេទិកាសេដ្ឋកិច្ចពិភពលោក គឺត្រូវនឹងរបៀបវារៈរបស់យុទ្ធសាស្ត្របញ្ចកោណ-ដំណាក់កាលទី១ របស់រដ្ឋាភិបាលកម្ពុជា។ សម្តេចបានបញ្ជាក់ថា ៖ « ជាពិសេស ត្រង់ការអភិវឌ្ឍវិស័យឯកជន និងការអភិវឌ្ឍសេដ្ឋកិច្ច និងសង្គមឌីជីថល ដែលរដ្ឋាភិបាលបានដាក់ចេញ»។
សម្តេចនាយករដ្ឋមន្ត្រី បានកោតសរសើរចំពោះតួនាទីដែលវេទិកាសេដ្ឋកិច្ចពិភពលោកបានចូលរួមចំណែកផ្សារភ្ជាប់ទំនាក់ទំនងរវាងវិស័យសាធារណៈនិងវិស័យឯកជន ក៏ដូចជាពាំនាំសមិទ្ធផលរបស់រដ្ឋាភិបាល និងសក្តានុពលកម្ពុជា ទៅបង្ហាញលើឆាកអន្តរជាតិ។
ជាមួយគ្នានោះ លោក ក្លូស ស្វប់ ក៏បានអញ្ជើញសម្តច ហ៊ុន ម៉ាណែត ចូលរួមក្នុងវេទិកាសេដ្ឋកិច្ចពិភពលោក ដែលនឹងធ្វើឡើងនៅទីក្រុងដាវ៉ូស(Davos) ប្រទេសស្វ៊ីស នាអំឡុងខែវិច្ឆិកា ឆ្នាំ២០២៣ ខណៈភាគីកម្ពុជា នឹងពិនិត្យលទ្ធភាពក្នុងការចូលរួម។
តាមការព្យាកររបស់ធនាគារអភិវឌ្ឍន៍អាស៊ី(ADB) សេដ្ឋកិច្ចកម្ពុជា នឹងសម្រេចបានកំណើន៥,៥ភាគរយក្នុងឆ្នាំ២០២៣៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
