តាមបណ្តាញតេឡេក្រាម សម្តេច ហ៊ុន ម៉ាណែត ក៏បញ្ជាឱ្យមានការកែសម្រួលភ្លាម ប្រសិនបើករណីនេះ ជារឿងពិត។ ទន្ទឹមនឹងនេះ សម្តេច នាយករដ្ឋមន្ត្រី ក៏សង្កត់ធ្ងន់លើដំណើរការតែងតាំងបុគ្គលណាមួយ ឱ្យបម្រើការងារក្នុងស្ថាប័ន ត្រូវតែត្រួតពិនិត្យ និងវាយតម្លៃឱ្យម៉ត់ចត់។ 

 

«ខ្ញុំសូមឱ្យមានការត្រួតពិនិត្យនិងវាយតម្លៃឲ្យបានច្បាស់លាស់ នូវបុគ្គលិកលក្ខណៈរបស់បុគ្គលនីមួយៗ ឲ្យបានហ្មត់ចត់មុននឹងតែងតាំង នៅតាមបណ្ដាស្ថាប័នរដ្ឋទាំងស៊ីវិល និងកងកម្លាំងប្រដាប់អាវុធ ទាំងថ្នាក់ជាតិនិងក្រោមជាតិ»។ សម្តេច ហ៊ុន ម៉ាណែត បន្ថែមបែបនេះ។

 

គួរកត់សម្គាល់ថា កំណែទម្រង់មុខងារសាធារណៈ ត្រូវបានរដ្ឋាភិបាលអាណត្តិថ្មី ចាត់ទុកជាកិច្ចការអាទិភាព ក្នុងនោះដំណើរការជ្រើសរើសមន្ត្រី គឺជាដំណាក់កាលដ៏ចាំបាច់ដែរ។ ដើម្បីធានាអំពីយុត្តិធម៌ និងភាពត្រឹមត្រូវនៃដំណើរការប្រឡង និងលទ្ធផលនៃការប្រឡង សម្តេច ហ៊ុន ម៉ាណែត ក៏បានប្រកាសផ្អាកការប្រឡងជ្រើសរើសមន្ត្រីថ្មី ក្នុងឆ្នាំ២០២៣ ដោយរង់ចាំយន្តការថ្មី ដែលកាន់តែមានសុក្រឹតភាព៕