ជាតិ
ក្រសួងធនធានទឹក ប្រាប់ឱ្យពលរដ្ឋសន្សំសំចៃទឹក ខណៈបាតុភូតអែលនីណូកើនឡើងខ្លាំង ត្រពាំង ស្រះទឹក មួយចំនួននៅខេត្តប៉ៃលិន បានរាំងស្ងួត កាលពីខែសីហា ឆ្នាំ២០២៣។ រូបភាព៖ មន្ទីរកសិកម្ម ខេត្តប៉ៃលិន
× ភ្នំពេញ៖ ក្រសួងធនធានទឹក បានក្រើនរំឭកឱ្យពលរដ្ឋប្រើប្រាស់ទឹកសន្សំសំចៃ ព្រោះរដូវវស្សាមានរយៈពេលខ្លី ខណៈបាតុភូតអែលនីណូ (El Nino) នឹងកើនឡើងខ្លាំង នៅចន្លោះខែកញ្ញាដល់ខែធ្នូ ឆ្នាំ២០២៣។ អែលនីណូ គឺជាបាតុភូតកម្ដៅ ដែលអាចបង្កឱ្យមានគ្រោះរាំងស្ងួត និងការកើនឡើងរលកកម្ដៅជាដើម។
ឆ្នាំនេះ មានប្រទេសជាច្រើន បានរងគ្រោះដោយសាររលកកម្ដៅ ដែលបណ្ដាលមកពីអែលនីណូ។ ក្នុងនោះឥណ្ឌា មីយ៉ាន់ម៉ា និងបណ្ដាប្រទេសមួយចំនួនទៀតលើពិភពលោក បានផ្អាកការនាំចេញអង្ករសរបស់ខ្លួន ដោយបារម្ភថា គ្រោះរាំងស្ងួតអាចបង្កផលប៉ះពាល់ដល់សន្តិសុខស្បៀងរបស់ពួកគេ។
ជាមួយគ្នានេះ ក្រសួងធនធានទឹក និងឧតុនិយម នៅថ្ងៃទី១៣ ខែកញ្ញា បានប្រាប់ឱ្យពលរដ្ឋប្រើប្រាស់ទឹកសន្សំសំចៃ ជាពិសេសតំបន់ឆ្ងាយពីប្រភពទឹក។ ការក្រើនរំឭកនេះ ធ្វើឡើងក្រោយពេលព្យាករណ៍អាកាសធាតុលើកទី៣ ឃើញថា បាតុភូតអែលនីណូ នឹងកើនឡើងដល់១០០ភាគរយ នៅចន្លោះខែកញ្ញា ដល់ខែធ្នូ។
បើតាមក្រសួង នៅខែកញ្ញានេះ មិនសូវមានភ្លៀងធ្លាក់រាយប៉ាយនោះទេ ដោយផ្ទៃដីរងទឹកភ្លៀងមានប្រមាណ៤០ទៅ៦០ភាគរយ ជាមួយនឹងកម្រិតទឹកភ្លៀងពីខ្សោយទៅមធ្យម។ ក្នុងនោះក៏អាចមានភ្លៀងធ្លាក់ច្រើននៅតាមផ្នែកខ្លះនៃ តំបន់ជួរភ្នំ ខ្ពង់រាប និងមាត់សមុទ្រ។
ចំពោះខែតុលា និងខែវិច្ឆិកា ទាំងភ្លៀងធ្លាក់រាយប៉ាយ និងកម្រិតទឹកភ្លៀង នឹងត្រូវថមថយ លាយឡំទៅដោយបាតុភូតផ្គររន្ទះ និងខ្យល់កន្រ្តាក់ជាមួយនឹងផ្ទៃដីរងទឹកភ្លៀងប្រមាណ៣០ទៅ៤០ភាគរយ។
ដោយឡែក រដូវវស្សាឆ្នាំ២០២៣នេះ នឹងបញ្ចប់ទៅលឿនជាងឆ្នាំ២០២២ ក្នុងនោះ តំបន់ខ្ពង់រាប ត្រូវបញ្ចប់ក្នុងសប្តាហ៍ទី៣ នៃខែតុលា, តំបន់វាលទំនាប និងតំបន់មាត់សមុទ្រ នឹងបញ្ចប់នៅក្នុងសប្តាហ៍ទី៤ នៃខែតុលា៕
Tag:
ក្រសួងធនធានទឹក
El Nino
អាកាសធាតុ
© រក្សាសិទ្ធិដោយ thmeythmey.com