ជាតិ
ក្រសួងការងារ ជំរុញឱ្យមន្ត្រីពង្រឹងការដោះស្រាយបញ្ហា ដល់ពលករក្រៅប្រទេស ពលករត្រឡប់ពីថៃ នាពេលកន្លងមក។
× ភ្នំពេញ៖ រាជរដ្ឋាភិបាលតាមរយៈក្រសួងការងារ បានចេញគោលការណ៍៣សំខាន់ៗ សំដៅ ផ្តល់សេវាកម្មការពារសិទ្ធិ និងផលប្រយោជន៍ដល់ពលករ ។ យោងតាមទីភ្នាក់ងារសារព័ត៌ មានកម្ពុជា(AKP)។
គោលការណ៍ទាំង៣នោះ រួមមានទី១ បញ្ជាឱ្យពង្រឹងសេវាអនុពន្ឋការងារ អមស្ថានឯកអគ្គរាជទូតកម្ពុជា ហើយសហការជាមួយមជ្ឈមណ្ឌលគាំពារពលករបរទេស តាមបណ្តាប្រទេសគោលដៅ។ ចំណុចទី២ បន្តពង្រឹងយន្តការចុះត្រួតពិនិត្យ និងធ្វើអធិការកិច្ចការងារទីភ្នាក់ងារជ្រើសរើសពលករឯកជន ដើម្បីធានាពីប្រសិទ្ធិភាពការងារជ្រើសពលករ។ ចំណែកចំណុចទី៣ ក្រសួងការងារនឹងបន្តគាំទ្រ និងផ្ដល់ភាពងាយស្រួលដល់ពលករធ្វើការនៅក្រៅប្រទេស តាមរយៈការសម្រួលបែបទឯកសារ ការគាំពារតាមផ្លូវច្បាប់ និងការអន្តរាគមសង្រ្គោះនៅពេលមានហានិភ័យ។
ទាក់ទិននឹងពលករក្រៅប្រទេស កាលពីពេលថ្មីៗនេះ អំឡុងពេលសម្ដេច ហ៊ុន ម៉ាណែត នាយករដ្ឋមន្ត្រី ចុះជួបកម្មករ ក៏បានបញ្ជាឱ្យក្រសួងពាក់ព័ន រួមមានក្រសួងយុត្តិធម៌ ក្រសួងការងារ ក្រសួងសេដ្ឋកិច្ច និងស្ថាប័នពាក់ព័ន្ធ ជួយរៀបចំបន្តសុពលភាពលិខិតឆ្លងដែនឬធ្វើថ្មី ដល់ពលករខ្មែរនៅក្រៅ ដោយផ្ដើមចេញពីពលករនៅសាធារណរដ្ឋកូរ៉េ។
គិតពីឆ្នាំ២០១៨ ដល់ឆ្នាំ២០២២ ក្រសួងបានសម្របសម្រួលពលករ និងដោះស្រាយបញ្ហាទូទៅបាន១៤ ៨៥១ករណី។ បច្ចុប្បន្ននេះ ពលរដ្ឋកម្ពុជាក្រៅប្រទេសប្រមាណ ១,៣ លាននាក់ ក្នុងមួយឆ្នាំៗ ពួកគេបានផ្ញើប្រាក់មកប្រទេសវិញប្រមាណ ២,៧ ពាន់លានដុល្លារ។ នេះបើតាមរបាយការណ៍របស់ក្រសួងការងារ។
សូមជម្រាបថា សព្វថ្ងៃពលករកម្ពុជាមាននៅប្រទេសថៃចំនួមន១ ២៣១ ៥០៨នាក់, កូរ៉េ ខាងត្បូង ៤៩ ៧៣៨នាក់, ម៉ាឡេស៊ី២២ ៦២១នាក់, ជប៉ុន១៦ ៥៦២នាក់, សិង្ហបុរី៨៥១នាក់, ហុងកុង២១៥នាក់ និងអារ៉ាប៊ីសាអូឌីត១១នាក់៕
© រក្សាសិទ្ធិដោយ thmeythmey.com