ការលើកឡើងនេះ ក្រោយពីលោក ជី សុផាត សង្កេត់ឃើញថា អ្នកបង្កើតមាតិកា ឬ Content Creator បានក្លាយជាការងារដ៏ពេញនិយមសម្រាប់ពលរដ្ឋខ្មែរនាយុគសម័យឌីជីថល។ អ្នកខ្លះសុខចិត្តបោះបង់ការងារអាជីព ហើយងាកមកធ្វើវីដេអូ,ខ្លះទៀតកំពុងបន្តអាជីព ប៉ុន្តែក៏ឆ្លៀតផលិតមាតិកាផ្សេងៗ ក្នុងន័យរកចំណូលបន្ថែមដូចគ្នា។
 

បើតាមលោក សុផាត ការចេះទាញយកប្រយោជន៍ពីបច្ចេកវិទ្យា ដោយផលិតវីដេអូកម្សាន្ត អប់រំជារឿងល្អប្រសើរ ប៉ុន្តែអ្នកបង្កើតមាតិកាទាំងអស់ក៏ត្រូវយល់ពីសីលធម៌សង្គម ដើម្បីជៀសវាងផលប៉ះពាល់ក្នុងសង្គម។ ជាក់ស្ដែងមាតិកាកម្សាន្តមួយចំនួនដូចជា ការឈ្លោះប្រកែក ជេរប្រមាថ ហែកហួរគ្នា,បរិភោគសត្វល្អិត ឬអសិរពិស និងវីដេអូរឿងភាគខ្លី ដែលមានឈុតអាសអាភាស ហើយជ្រកក្រោមពាក្យអប់រំ សុទ្ធសឹងតែជាមាតិកាទាក់ទាញអ្នកទស្សនាច្រើន ប៉ុន្តែបង្កឱ្យសីលធម៌សង្គមធ្លាក់ចុះយ៉ាងធ្ងន់ធ្ងរ។