សម្ដេច ហ៊ុន ម៉ាណែត បានផ្ដាំផ្ញើទៅកាន់ កីឡករ-កីឡាការិនីកម្ពុជា ឱ្យបន្តហ្វឹកហាត់ និងថែបំប៉នសុខភាពឱ្យបានល្អ, ប្រកាន់នូវវិន័យ សីលធម៌ជាកីឡាករ កីឡាការិនី និងជាមិត្តល្អ ព្រោះអត្តពលិក គឺជាអង្គទូតតំណាងឲ្យជាតិ, ចៀសវាងនូវការប្រើប្រាស់សារធាតុហាមឃាត់ និងខុសពីបទវិន័យកីឡា, រក្សាសាមគ្គីភាព និងចេះជួយគ្នាទៅវិញទៅមក, បង្កើតចំណងមិត្តភាព និងសាមគ្គីភាពជាមួយអត្ដពលិក មកពីបណ្ដាលប្រទេសនានា ដោយផ្អែកលើគោលការណ៍ ឈ្នះ និងការបង្កើនមិត្តច្រើន ដោយឈរលើក្រមសីលធម៌ល្អ។

 

នាយករដ្ឋមន្ដ្រីកម្ពុជារូបនេះ បន្តថា ការចេញទៅប្រកួត ដើម្បីជាតិមាតុភូមិ ដូច្នេះចៀសវាងការបង្កបញ្ហាណាមួយ ដែលនាំឱ្យប៉ះពាល់ដល់មុខមាត់ និងកិត្តិយសជាតិ។

សម្ដេច ហ៊ុន ម៉ាណែត ក៏អរគុណដល់គ្រូបង្វឹក ក្រុមការងារ និងគ្រប់ភាគីពាក់ព័ន្ធ ដែលបានត្រៀមលក្ខណៈ និងជួយរៀបចំគ្រប់យ៉ាង សម្រាប់អត្ដពលិកកម្ពុជា ទៅចូលរួមព្រឹត្តិការណ៍អាស៊ីហ្គេម លើកទី១៩ នៅទីក្រុង Hangzhou ប្រទេសចិន។
 

ព្រឹត្តិការណ៍ Asian Games 2022 នៅទីក្រុង Hangzhou ប្រទេសចិន ចាប់ប្រកួតពីថ្ងៃទី១៩ ខែកញ្ញា ដល់ថ្ងៃទី៨ ខែតុលា ឆ្នាំ២០២៣ ដោយពិធីបើក នឹងត្រូវធ្វើនៅថ្ងៃទី២៣ ខែកញ្ញា។ កម្ពុជា បានបញ្ជូនអត្ដពលិក ១១៤នាក់ ដោយប្រកួតលើ ១៧ប្រភេទកីឡា៕