នាយករដ្ឋមន្ត្រីវៀតណាមលោក​ ផាម មិញ ជិញ ជួបជាមួយស្ថាបនិកសាជីវកម្ម Microsoft លោក Bill Gates នារសៀលថ្ងៃទី២០ ខែកញ្ញា។ វៀតណាមកំពុងផ្តល់អាទិភាពលើការជំរុញការអភិវឌ្ឍន៍ដោយផ្អែកលើវិទ្យាសាស្ត្រ និងបច្ចេកវិទ្យា និងការច្នៃប្រឌិត រួមទាំងការអភិវឌ្ឍផលិតកម្ម និងបណ្តាញផ្គត់ផ្គង់បន្ទះឈីបសឺមីកុងឌុចទ័រផងដែរ។ 

 

នាយករដ្ឋមន្ត្រីវៀតណាមរូបនេះបានស្នើឲ្យលោក Bill Gates តាមរយៈមូលនិធិ The Gates Foundations បន្តគាំទ្រសកម្មភាពចាប់ផ្តើមអាជីវកម្មប្រកបដោយភាពច្នៃប្រឌិត វិទ្យាសាស្ត្រ និងបច្ចេកវិទ្យា ឆ្លើយតបទៅនឹងការប្រែប្រួលអាកាសធាតុ លើកកម្ពស់ការផ្លាស់ប្តូរបៃតង អភិវឌ្ឍថាមពលកកើតឡើងវិញ និងការកែលម្អសមត្ថភាពសុខាភិបាល និងការអប់រំ។

 

លោក Bill Gates បានអះអាងថា វៀតណាម​មាន​សារសំខាន់​ណាស់​ចំពោះ​គោល​នយោបាយ​អភិវឌ្ឍន៍​របស់ Microsoft និង​មូលនិធិ​របស់​ខ្លួន។លោកនឹងបន្តជំរុញកិច្ចសហប្រតិបត្តិការ និងសកម្មភាពគាំទ្រសម្រាប់វៀតណាម ដោយផ្តោតលើវិស័យអនាម័យ ទឹកស្អាត បរិស្ថាន សុខាភិបាល និងបញ្ញាសប្បនិម្មិត្ត (AI)។ 

 

The Gates Foundations ដែលដឹកនាំដោយ Bill Gates ផ្តោតលើសកម្មភាពរួមទាំងការអភិវឌ្ឍន៍កសិកម្ម សេវាហិរញ្ញវត្ថុសម្រាប់ជនក្រីក្រ ទឹកស្អាត និងអនាម័យ ការអប់រំសកល សុខភាព និងអាហារូបត្ថម្ភ។ មូលនិធិនេះក៏អនុវត្តសកម្មភាពក្នុងវិស័យសុខភាពសាធារណៈ និងសុខភាពប្រជាជន ដោយផ្តោតលើជំងឺឆ្លង ជំងឺទូទៅ និងជំងឺត្រូពិច។

 

នៅវៀតណាមសាជីវកម្ម Microsoft កំពុងមមាញឹកនូវសកម្មភាពជាច្រើន និងបានរួមចំណែកជាមួយវិស័យបច្ចេកវិទ្យាក្នុងរយៈពេលប៉ុន្មានឆ្នាំកន្លងមកនេះ។ ទាក់ទងនឹងវិស័យសុខាភិបាល សកម្មភាពលេចធ្លោមួយរបស់ Bill Gates គឺការរួមចំណែកចំពោះមូលនិធិសុខភាពសកល ដើម្បីគាំទ្រកម្មវិធីជំងឺរបេង សួត គ្រុនចាញ់ និងមេរោគអេដស៍នៅវៀតណាមនាពេលថ្មីៗនេះ។ មូលនិធិ Gates ក៏គាំទ្រសកម្មភាពប្រើប្រាស់បច្ចេកវិទ្យា ដើម្បីប្រយុទ្ធប្រឆាំងនឹងការប្រែប្រួលអាកាសធាតុនៅតំបន់ដីសណ្ដមេគង្គផងដែរ៕