ធនាគារអភិវឌ្ឍន៍អាស៊ី (ADB) បានទម្លាក់ការព្យាករកំណើនសេដ្ឋកិច្ចកម្ពុជាសម្រាប់ឆ្នាំនេះ ពី ៥,៥ភាគរយ មកត្រឹម ៥,៣ភាគរយវិញ។ ការទម្លាក់នូវកំណើនសេដ្ឋកិច្ចនេះ គឺដោយសារតែវិស័យឧស្សាហកម្ម និងកសិកម្មកម្ពុជា មានកំណើនតិចជាងការរំពឹងទុកនៅឆមាសទី១ ដែលបណ្តាលមកពីការធ្លាក់ចុះសេដ្ឋកិច្ចសកល។ នេះបើយោងតាមសេចក្តីប្រកាសព័ត៌មានរបស់ADB នាថ្ងៃទី២០កញ្ញា។
របាយការណ៍របស់ADB បានបង្ហាញថា ការនាំចេញសម្លៀកបំពាក់ ស្បែកជើង និងទំនិញធ្វើដំណើររបស់កម្ពុជាបានធ្លាក់ចុះ ១៨,៦ភាគរយ ធៀបនឹងឆមាសទី១ កាលឆ្នាំ២០២២។ ការធ្លាក់ចុះនេះ ត្រូវបានប៉ះប៉ូវមួយផ្នែកដោយការកើនឡើង២២,៩ភាគរយ នៃការនាំចេញផលិតផលផ្សេងទៀត ក្រៅពីសម្លៀកបំពាក់។ ជាពិសេសគ្រឿងបន្លាស់រថយន្ត សូឡា និងគ្រឿងសង្ហារិម ខណៈការនាំចូលសម្ភារសំណង់ធ្លាក់ចុះ ៦,៣ ភាគរយ។
លោកស្រី Jyotsana Varma នាយិកា ADB ប្រចាំកម្ពុជា បានលើកឡើងថា កំណើនសេដ្ឋកិច្ចរបស់ប្រទេសធំៗដែលមានការជឿនលឿន ត្រូវបានរំពឹងថា នឹងជំរុញការនាំចេញរបស់កម្ពុជាសម្រាប់ឆមាសទី២ ទោះបីជាកំណើនវិស័យឧស្សាហកម្មក្នុងស្រុក បានថមថយក្នុងឆមាសទី១ក៏ដោយ។ លោកបន្តរៀបរាប់ដូច្នេះ៖ «វិស័យសេវាកម្មចូលរួមចំណែកធំជាងគេ ចំពោះកំណើនសេដ្ឋកិច្ចឆ្នាំនេះ ដោយវិស័យនេះបានកើនលើសការរំពឹងទុកនៅក្នុងឆមាសទី១ ជាពិសេសដោយ សារការងើបឡើងវិញខ្លាំង នៃវិស័យទេសចរណ៍»។
តាមការព្យាកររបស់ADB វិស័យសេវាកម្មរបស់កម្ពុជានៅឆ្នាំ២០២៣ នឹងកើនពី ៧,៣ភាគរយ ទៅ ៨ភាគរយ។ ដោយឡែក វិស័យឧស្សាហកម្ម នឹងត្រូវថយពី ៥,៨ភាគរយ មក ៤,៨ភាគរយវិញ ខណៈការព្យាករសម្រាប់កំណើនវិស័យកសិកម្មបានធ្លាក់ពី ១,១ភាគរយ មកត្រឹម០,៩ភាគរយ។ របាយការណ៍នេះរក្សាការព្យាករអតិផរណាសម្រាប់ឆ្នាំនេះនៅកម្រិត ៣ភាគរយ និងសម្រាប់ឆ្នាំ២០២៤ មានក្នុងកម្រិត ៤ភាគរយ។
រីឯ ឱនភាពពាណិជ្ជកម្មអន្តរជាតិ ដែលមានភាពប្រសើរឡើង និងការងើបឡើងវិញនៃវិស័យទេសចរណ៍ នឹងបន្តបង្រួមឱនភាពគណនីចរន្ត។ ABD បានបញ្ជាក់ថា ហានិភ័យសម្រាប់ទស្សនវិស័យនេះ រួមមាន កំណើនសេដ្ឋកិច្ចខ្សោយនៃបណ្តាប្រទេសជឿនលឿន ,ការមកដល់នៃភ្ញៀវទេសចរ និងលំហូរវិនិយោគផ្ទាល់ពីបរទេសតិច ,ការអូសបន្លាយនៃការរឹតបន្តឹងស្ថានភាពហិរញ្ញវត្ថុជាសកល ,ការកើនឡើងតម្លៃថាមពល ,ក្តីបារម្ភអំពីបំណុលឯកជនដែលមានកម្រិតខ្ពស់ និងអំពីស្ថិរភាពហិរញ្ញវត្ថុក្នុងស្រុក និង អាកាសធាតុដែលកាន់តែអាក្រក់ដោយសារការប្រែប្រួលបរិយាកាសផែនដី។
ដ្បិត មានការទម្លាក់កំណើនសេដ្ឋកិច្ចកម្ពុជាមកនៅត្រឹម ៥,៣ភាគរយសម្រាប់ឆ្នាំ២០២៣ ប៉ុន្តែ ADB នៅរក្សាការព្យាកររបស់ខ្លួនដដែលសម្រាប់ឆ្នាំ២០២៣ សេដ្ឋកិច្ចកម្ពុជាបន្តកើនឡើងក្នុងអត្រា៦ភាគរយ៕