FIFA Ranking៖ កម្ពុជាធ្លាក់១ចំណាត់ថ្នាក់ ទោះធ្វើបានល្អនៅជំនួបមិត្តភាព

FIFA

កីឡាជាតិ

ជាតិ

FIFA Ranking៖ កម្ពុជាធ្លាក់១ចំណាត់ថ្នាក់ ទោះធ្វើបានល្អនៅជំនួបមិត្តភាព

25, Sep 2023 , 5:19 pm

រូបភាព

ក្រុមកីឡាបាល់ទាត់ជម្រើសជាតិកម្ពុជា អំឡុងប្រកួតមិត្តភាពអន្តរជាតិនៅពហុកីឡដ្ឋានជាតិអូឡាំពិក

ដោយ: ទេព ពិទូរ្យ

ក្រុមកីឡាករបាល់ទាត់ជម្រើសជាតិកម្ពុជា ធ្លាក់ចំណាត់ថ្នាក់ពីលេខរៀងទី១៧៦ ទៅ១៧៧ ក្នុងតារាងចំណាត់ថ្នាក់ពិភពលោក (FIFA Ranking) ប្រចាំខែកញ្ញា ឆ្នាំ២០២៣។ នេះមានន័យថាគោព្រៃធ្លាក់ចំណាត់ថ្នាក់១លេខ បើធៀបនឹងខែមុន បើទោះពួកគេធ្វើបានល្អក្នុងការប្រកួតមិត្តភាពអន្តរជាតិពីលើកអំឡុង FIFA Day ក្តី។ ក្នុងតំបន់អាស៊ីអាគ្នេយ៍ ថៃ ឡាវ ហ្វីលីពីន វៀតណាម ម៉ាឡេស៊ី សិង្ហបុរី និងឥណ្ឌូណេស៊ី ឡើងចំណាត់ថ្នាក់ទាំងអស់។

សហព័ន្ធកីឡាបាល់ទាត់អន្តរជាតិ (FIFA) បានចេញតារាងចំណាត់ថ្នាក់ចុងក្រោយនៅថ្ងៃទី២១ ខែកញ្ញា ឆ្នាំ២០២៣ ដោយក្រុមគោព្រៃកម្ពុជា បានធ្លាក់១ចំណាត់ថ្នាក់បើប្រៀបធៀបទៅនឹងតារាងកាលពីខែសីហា ពោលគឺធ្លាក់ពីលេខ១៧៦ មកលេខ១៧៧ ក្នុងចំណោម ២០២សហព័ន្ធកីឡាបាល់ទាត់លើលោក។

សម្រាប់ខែកញ្ញានេះ FIFA បានផ្តល់ពិន្ទុដល់កម្ពុជា ៩៤៨,៦៤ ខណៈពិន្ទុចាស់ ៩៤២,៩៧ ពោលគឺឡើងតែ៥,៦៧ពិន្ទុប៉ុណ្ណោះ បើទោះក្រុមដែលស្ថិតក្រោមការដឹកនាំរបស់គ្រូបង្វឹកលោក Felix Dalmas ធ្វើបានប្រសើរនៅពីរប្រកួតចុងក្រោយក្នុងជំនួបមិត្តភាពអន្តរជាតិក្តី។ កម្ពុជា ស្មើហុងកុង ១-១ មុនពេលឈ្នះម៉ាកាវ ៤-០ ក្នុងជំនួបមិត្តភាពអន្តរជាតិកាលពីដើមខែកន្លងទៅ។

ចំណោមក្រុមទាំង១១ នៅអាស៊ីអាគ្នេយ៍ មានតែកម្ពុជា មីយ៉ាន់ម៉ា និងព្រុយណេ ប៉ុណ្ណោះ ដែលធ្លាក់ចំណាត់ថ្នាក់ ស្របពេលទីម័រខាងកើតនៅទ្រឹង។ ថៃ សិង្ហបុរី ឡាវ ហ្វីលីពីន វៀតណាម ម៉ាឡេស៊ី និងឥណ្ឌូណេស៊ី ឡើងចំណាត់ថ្នាក់រៀងខ្លួន។

បើប្រៀបធៀបនៅក្នុងតំបន់អាស៊ាន វៀតណាម មានចំណាត់ថ្នាក់ល្អជាងគេ ដោយស្ថិតនៅលេខរៀងទី៩៥ពិភលោក តាមពីក្រោយដោយ ថៃ (លេខ១១២) ហ្វីលីពីន (១៣២) ម៉ាឡេស៊ី (១៣៤) សិង្ហបុរី (១៦២) ឥណ្ឌូណេស៊ី (១៤៧) មីយ៉ាន់ម៉ា (១៦១)។ កម្ពុជាស្ថិតនៅចំណាត់ថ្នាក់លេខ១៧៧ ឈរពីលើ ឡាវ (១៨៦) ព្រុយណេ (១៩១) និងទីម័រខាងកើត (១៩២)។

ដោយឡែក តារាងចំណាត់ថ្នាក់ FIFA Ranking របស់ក្រុងទាំងអស់លើលោក នៅខែកញ្ញានេះ អាហ្សង់ទីនស្ថិតនៅចំណាត់ថ្នាក់លេខ១ ដោយឈរលើបារាំង ប្រេស៊ីល អង់គ្លេស បែលហ្ស៊ិក ក្រូអាស៊ី ហូឡង់ ព័រទុយហ្កាល់ អ៊ីតាលី និងអេស្ប៉ាញ ចំណោម Top 10។ ជប៉ុន (១៩) ឈរលេខ១តំបន់អាស៊ី និងបន្តបន្ទាប់មាន អ៊ីរ៉ង់ (២១) កូរ៉េខាងត្បូង (២៦) អូស្ត្រាលី (២៧) អារ៉ាប៊ីសាអូឌីត (៥៧) កាតា (៦១) អ៊ីរ៉ាក់ (៦៩) អេមីរ៉ាតអារ៉ាប់រួម (៧០) អូមង់ (៧៣) និងអ៊ូបេគីស្ថាន (៧៥)៕