រូបភាពសម្ដេច ហ៊ុន ម៉ាណែត នៅលើប៉ាណូនេះ បានក្លាយជាប្រធានបទថ្មីមួយទៀត សម្រាប់អ្នកមិនពេញចិត្តរដ្ឋាភិបាល រិះគន់ថា រដ្ឋចំណាយថវិកាខ្ជះខ្ជាយ និងអត់ប្រយោជន៍ សម្រាប់ការផ្សព្វផ្សាយនេះ។ ឆ្លើយតបការរិះគន់នេះ អ្នកនាំពាក្យរដ្ឋាភិបាល បានចេញមុខបកស្រាយវិញថា រដ្ឋាភិបាល មិនពាក់ព័ន្ធការផ្សព្វផ្សាយនេះឡើយ។
 

អ្នកនាំពាក្យរដ្ឋាភិបាល បានចេញសេចក្តីបំភ្លឺព័ត៌មានមួយ កាលពីថ្ងៃទី២៥ កញ្ញាថា ការរៀបចំផ្សព្វផ្សាយពាណិជ្ជកម្មរូបសម្ដេច ហ៊ុន ម៉ាណែត លើផ្ទាំងប៉ាណូខាងលើ ពុំមែនជាការចាត់តាំងឱ្យរៀបចំដោយរដ្ឋាភិបាលកម្ពុជា ហើយក៏មិនមានការចំណាយថវិការបស់រដ្ឋដែរ។
 

អ្នកនាំពាក្យ បកស្រាយទៀតថា ការផ្សព្វផ្សាយនេះ គឺជាមនោសញ្ចេតនា ទឹកចិត្តស្រលាញ់ និងគាំទ្ររបស់ពលរដ្ឋខ្មែរ រស់នៅអាម៉េរិក និងកាណាដា ចំពោះសម្ដេចនាយករដ្ឋមន្រ្តីកម្ពុជាប៉ុណ្ណោះ។ «ការរៀបចំការផ្សព្វផ្សាយពាណិជ្ជកម្មតាមផ្ទាំងប៉ាណូខាងលើ គឺមានការសម្របសម្រួលពីបងប្អូនខ្មែរយើងនៅសហរដ្ឋអាម៉េរិក និងមានការចូលរួមគាំទ្រផ្សព្វផ្សាយដោយឥតគិតថ្លៃពីក្រុមហ៊ុនផ្សព្វផ្សាយពាណិជ្ជកម្មតាមផ្ទាំងប៉ាណូ ឬផ្សព្វផ្សាយតាមBillboard នោះដែរ»។ នេះជាការអះអាងរបស់អ្នកនាំពាក្យ ដែលចាត់ទុកការរិះគន់លើរដ្ឋាភិបាលជុំវិញករណីផ្ទាំងប៉ាណូនេះ ជាការចោទប្រកាន់ដោយគ្មានអំណះអំណាងច្បាស់លាស់ ដោយផ្ទុយពីការពិត ក្នុងគោលបំណងកេងចំណេញនយោបាយ និងបំភ័ន្តសាធារណៈមតិ។

 ទាក់ទងនឹងការផ្សព្វផ្សាយពាណិជ្ជកម្មលើផ្ទាំងប៉ាណូ នៅតំបន់ Times Square នេះ គឺមានតម្លៃចាប់ពី៥០០០ដុល្លារឡើងទៅក្នុងមួយថ្ងៃ អាស្រ័យតាមកម្មវិធីនីមួយៗ។ បើតាមវេបសាយរបស់ Times Square បានបញ្ជាក់ពីតម្លៃអប្បបរមា ក្នុងការផ្សព្វផ្សាយនេះ ចន្លោះពី៥០០០ដុល្លារ ទៅដល់២៥០០០ដុល្លារ ក្នុងរយៈពេលពី១ ទៅ៣ ថ្ងៃ៕