Inter Miami នឹងត្រូវប្រជែងវគ្គផ្តាច់ព្រ័ត្រពានរង្វាន់ US Open Cup ទល់នឹងក្រុម Houston Dynamo នាថ្ងៃទី២៨ ខែកញ្ញា វេលាម៉ោង ៧:៣០ព្រឹក(ម៉ោងនៅកម្ពុជា)។
 

មុនពេលដល់ការប្រកួតវគ្គផ្តាច់ព្រ័ត្រ Messi បានបង្ហាញខ្លួននៅក្នុងការប្រកួតលីគកំពូលអាម៉េរិកទល់នឹងក្រុម Toronto FC កាលពីសប្តាហ៍មុន ប៉ុន្តែត្រូវបានប្តូរចេញត្រឹមនាទី៣៦ ដោយសារតែបញ្ហារបួស។ បញ្ហារបួសបានក្លាយជាក្តីបារម្ភខ្លាំងដល់ក្លិប Inter Miami មុនការប្រកួតសំខាន់នេះ។
 

ប្រធានក្រុមជម្រើសជាតិអាហ្សង់ទីន និងក្លិប Inter Miami បានជួបបញ្ហារបួស ហើយក៏កំពុងតែមិនច្បាស់ពីវត្តមានសម្រាប់ការប្រកួតវគ្គផ្តាច់ព្រ័ត្រ US Open Cup ក្រោយពេលតារាបាល់ទាត់អាហ្សង់ទីនមានបំណងចង់ឈ្នះពានរង្វាន់លើកទីពីរសម្រាប់ក្លិបថ្មីរបស់ខ្លួនស្ថិតក្នុងក្របខណ្ឌ Major League Soccer។ Messi បានជួយក្លិប Inter Miami ឈ្នះពានរង្វាន់ League Cup ដែលជាពានរង្វាន់ប្រជែងរវាងក្រុមមកពីលីគកំពូលម៉ិកស៊ិក Liga MX ទល់នឹង MLS។
 

«យើងនឹងនៅតែបន្តរង់ចាំសម្រាប់ Leo រហូតដល់ថ្ងៃស្អែក នឹងវិនាទីចុងក្រោយ។ ខ្ញុំនឹងអង្គុយរង់ចាំជាមួយគាត់ ដើម្បីនឹងឃើញថាអារម្មណ៍គេយ៉ាងណា ហើយយើងក៏នឹងអាចឈានដល់ការធ្វើកិច្ចព្រមព្រៀងនៅថ្ងៃស្អែក។ មានបញ្ហាបីនៅទីនេះ មានកីឡាករប្រកួត បន្ទាប់មកត្រូវលេងវគ្គផ្តាច់ព្រ័ត្រ ហើយបន្ទាប់មកមានអ្វីកើតឡើងជាបន្តបន្ទាប់ យើងត្រូវតែព្យាយាមធ្វើការសម្រេចចិត្ត វាតែងតែមានហានិភ័យ ប៉ុន្តែយើងត្រូវកាត់បន្ថយពួកគេ។»។ លោក Martino បាននិយាយក្នុងសន្និសីទការសែតមុនការប្រកួតបែបនេះ។
 

ម្ចាស់ពានរង្វាន់ Ballon d’Or ៧សម័យ រកបាន ១១គ្រាប់នឹងបញ្ជូនបាល់ ៥គ្រាប់ ក្នុងការប្រកួតចំនួន ១២លើក សម្រាប់ក្លិប ​Inter Miami ចាប់តាំងពីរូបគេបានផ្លាស់មកដល់ក្លិបនេះ ក្រោយចាកចេញពីក្លិប Paris Saint Germain។
 

ស្ថិតក្រោមវត្តមានរបស់ប្រធានក្រុម Messi នៅលើទីលានសម្រាប់ក្រុមស្ថិតក្រោមការដឹកនាំរបស់លោក Martino មិនដែលរងបរាជ័យឡើយ។ ក្រៅពី Messi ខ្សែការពារស្លាប Jordi Alba ដែលជាមិត្តរួមក្រុមក៏មានបញ្ហារបួសដូចគ្នាផងដែរ៕