កីឡាអេឡិចត្រូនិក ត្រូវបានដាក់បញ្ចូលក្នុងការប្រកួតកីឡាប្រចាំតំបន់អាស៊ីនេះលើកដំបូង ក្នុងក្រុងហាងចូវ ប្រទេសចិន ដោយមាន៧វិញ្ញាសា។ វិស័យ Esports កំពុងជំរុញការប្រកួតប្រជែងរបស់ខ្លួនឱ្យបានកាន់តែសុះសាយ ដើម្បីអាចត្រូវបានបញ្ចូលទៅក្នុងការប្រកួតកីឡាអូឡាំពិកថែមទៀត។ ក្រុមម្ចាស់ផ្ទះចិនហាក់បង្ហាញសមត្ថភាពខ្លាំងនៃការប្រកួតប្រជែងលើកីឡាអេឡិចត្រូនិកនេះ។
 

ជាពិសេសស្ថិតនៅខាងក្នុងកន្លែងប្រកួតកីឡា Esports ដែលទើបនឹងបង្ហាញការប្រកួតលើកដំបូងនៅក្នុង Asian Games ដោយការរៀបចំប្រកួតមានការប្រើប្រាស់ភ្លើងពណ៌ប្រដេញ មានអ្នកអត្ថាធិប្បាយផ្ទាល់ដើម្បីបង្កើតអ្វីមួយដែលស្រដៀងទៅនឹងឈុតឆាកដូចនឹងការប្រកួតហ្គេមក្នុងភាពយន្ត។ ការប្រកួតមានអ្នកគាំទ្រជាច្រើនរយនាក់ លាយឡំជាមួយការកាន់ដំបងភ្លើងពណ៍ចម្រុះពណ៍ និងបានស្រែងគាំទ្ររបស់ពួកគេ នៅពេលអ្នកអត្ថាធិប្បាយណែនាំក្រុមជនជាតិចិន។
  

វិញ្ញាសា Arena of Valor ដែលក្រុមចិនដណ្តើមបានមេដាយមាសលើកដំបូង គឺជាប្រភេទការប្រកួតស្រដៀងទៅនឹងហ្គេម Mobile Legends ដែលល្បីល្បាញខ្លាំងនៅក្នុងតំបន់អាស៊ីអាគ្នេយ៍ ដោយមានកីឡាករចំនួន ៥នាក់ ត្រូវជ្រើសរើសតួអង្គដែលភាគច្រើនគេហៅថា «Heroes»។
 

ម៉ាឡេស៊ី ទទួលបានមេដាយប្រាក់ ពីវិញ្ញាសា Arena of Valor នេះ ខណៈថៃជាម្ចាស់មេដាយសំរិទ្ធិ លើកដំបូងផងដែរសម្រាប់ការប្រកួតប្រជែងលើកីឡាអេឡិចត្រូនិក នៅកីឡាអាស៊ី។
  

ប្រទេសចិនត្រូវបានគេដឹងថាជាទីកន្លែងដ៏ធំជាងគេបង្អស់លើពិភពលោក ជាទីផ្សារនៃកីឡាអេឡិចត្រូនិកដ៏ធំរួមតាំងកីឡាករដ៏ច្រើន ព្រមទាំងអ្នកគាំទ្រក្នុងវិស័យ Esports មួយនេះ។ ឆ្នាំ ២០២២ ទីផ្សារកីឡា Esports ក្នុងប្រទេសចិនរកបានប្រាក់ប្រមាណ ៤៤៥លានដុល្លារ ដែលតម្លៃនេះមានច្រើនជាង ៦៤,៨ភាគរយ នៃទីផ្សារក្នុងរបស់អាស៊ីអាគ្នេយ៍ ហើយចិនបានបង្កើនចំនួនការគាំទ្រដល់ទៅ ៤០០លាននាក់។
 

វិស័យ Esports នៅក្នុងប្រទេសចិនមកដល់បច្ចុប្បន្នកំពុងតែក្លាយទៅជាវិស័យដ៏មានសក្តានុពលដែលរដ្ឋាភិបាលចិនកំពុងចង់កែប្រែឱ្យក្លាយទៅជាឧស្សាហកម្មកីឡាអេឡិចត្រូនិក៕