ក្រុម Al Hilal កំពុងតែត្រៀមខ្លួនសម្រាប់បន្តការប្រកួតនៅក្នុងពានរង្វាន់ AFC Champions League ដែលធ្វើឡើងនៅក្នុងប្រទេសអ៊ីរ៉ង់ ទល់នឹងក្រុម Nassaji Mazandaran នាថ្ងៃទី៣ ខែតុលា។ 
 

វីដេអូមួយបានចែកចាយនៅលើបណ្តាញសង្គម X អតីត Twitter បានបង្ហាញអំពីសកម្មភាពក្រុមអ្នករៀបចំទីលាន បានរៀបចំដាំស្មៅថ្មីនៅលើទីលានក្នុងកីឡដ្ឋាន Azadi មុនការប្រកួត ប៉ុន្តែនាវីដេអូនោះហាក់បង្ហាញថាទីលានក្នុងកីឡដ្ឋាន គឺក្រាលពោរពេញទៅដោយស៊ីម៉ង់ ហើយការទ្រាប់ស្មៅពីលើហាក់មានភាពស្តើងជាងកីឡដ្ឋានការប្រកួតទូទៅ។
  

Neymar Jr បានបង្ហាញអារម្មណ៍ហួសចិត្តនឹងជាអស់សំណើច ក្រោយឃើញទីលានប្រកួតដែលក្រុមរបស់គេនឹងត្រៀមខ្លួនប្រកួតនៅក្នុងជំនួប ACL។ Neymar ធ្លាប់បានបង្ហាញខ្លួនឱ្យ Al Hilal នៅក្នុងពានរង្វាន់ ACL ដោយការប្រកួតនោះក្រុមរបស់ខ្សែប្រយុទ្ធសញ្ជាតិប្រេស៊ីលបញ្ចប់ត្រឹមលទ្ធផលស្មើ ១-១ ទល់នឹងក្រុម Navbahor។
 

ពេលឃើញវីដេអូនៅលើបណ្តាញសង្គម X ខ្សែប្រយុទ្ធវ័យ ៣១ឆ្នាំ បានសរសេរបង្ហោះនៅលើគណនីរបស់គេដូច្នេះថា ៖«នេះមិនអាចទៅរួចនោះទេ» ដោយលាយឡំជាមួយនឹងរូបភាព (Emoji) បង្ហាញពីអារម្មណ៍នៃការហួសចិត្តនិងរូបភាពនៃការអស់សំណើច។
 

សម្រាប់ការប្រកួតជំនួបទីពីរនៃក្រុម Al Hilal ខ្សែប្រយុទ្ធ Neymar នឹងអាចបង្ហាញខ្លួនសារជាថ្មីសម្រាប់ក្រុមដែលដឹកនាំដោយគ្រូបង្វឹកលោក ​Jorge Jesus បើទោះជារវាង Neymar នឹងគ្រូបង្វឹកមានភាពមិនចុះសម្រុងគ្នា៕