ប្រធាននាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ នៃអាជ្ញាធរជាតិអប្សរា លោក ភឿន សុឃីម បានបញ្ជាក់នៅថ្ងៃទី៤ តុលាថា ស្ថានភាពទឹកនៅតំបន់អង្គរ កំពុងគំហុកខ្លាំង ដែលតម្រូវឱ្យយកចិត្តទុកដាក់ខ្ពស់ក្នុងការគ្រប់គ្រងស្ថានការណ៍។ បើតាមលោក សុឃីម ក្រុមការងារតាមដានទាំងថ្ងៃទាំងយប់ និងកំពុងបើកទ្វារទឹកសំខាន់ៗ ដើម្បីបញ្ជៀសទម្លាក់ទៅផ្នែកខាងក្រោម។ 

 

លោក សុឃីម បន្តថា អាជ្ញាធរជាតិអប្សរាបានបង្ហូរទឹកទៅស្ទឹងពួក ស្ទឹងព្រះស្រុក និងមួយផ្នែកទៀតបង្ហូរចូលទុកក្នុង កសិន្ធុអង្គរវត្ត កសិន្ធុអង្គរធំ បារាយការណ៍ខាងលិច បារាយណ៍ខាងជើង និងតាមបារាយណ៍ដទៃទៀត។

 

តាមអ្នកជំនាញទឹក ស្ថានភាពទឹកក្នុងឆ្នាំ២០២៣នេះ គឺមានគំហុកខ្លាំងបើធៀបនឹងឆ្នាំ២០១៤។ យ៉ាងណា លោក សុឃីម បានបញ្ជាក់ថា អាជ្ញាធរជាតិអប្សរាអាចគ្រប់គ្រងស្ថានការណ៍ទាំងនេះបាន និងធានាថា ជំនន់ទឹកភ្លៀងមិនអាចជន់លិចតំបន់ប្រាសាទនិងក្រុងសៀមរាបបានឡើយ។ លោកពន្យល់ថា ដោយសារតំបន់អង្គរបានសាងសង់ទ្វារទឹកច្រើន និងបានស្ដារប្រព័ន្ធចាស់ៗដែល​មានស្រាប់ ទើបអាចគ្រប់គ្រងស្ថានការណ៍នេះបាន។ 

 

ស្ថានភាពទឹកអាចនឹងធូរស្រាលវិញកំឡុងពេល២ទៅ៣ថ្ងៃបន្ទាប់ ក្នុងករណីពុំមានភ្លៀងធ្លាក់បន្តទៀត។ លោក សុឃីម ស្នើឱ្យពលរដ្ឋយោគយល់កំឡុងពេលនេះ ខណៈដែលមានការបើកទ្វារទឹកច្រើនកន្លែង ដែលអាចបណ្ដាលឱ្យផ្ទះពលរដ្ឋខ្លះនៅជាប់មាត់អូរជន់លិចក្នុងរយៈពេលខ្លី៕