ជាតិ
នយោបាយជាតិ
×![]()
ដោយ: រួបរួម
សម្តេច ហ៊ុន ម៉ាណែត បានប្រាប់ទៅលោកឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ ពាក់ព័ន្ធករណីនាយទាហានច្រើនជាងពលទាហាននាពេលបច្ចុប្បន្ន។ ប្រមុខរដ្ឋាភិបាលបានបញ្ជាក់យ៉ាងដូច្នេះ នាពិធីប្រារព្ធទិវាគ្រូបង្រៀន ៥តុលា នៅវិទ្យាស្ថានបច្ចេកវិទ្យាកម្ពុជា។
បច្ចុប្បន្ន នាយទាហានមានច្រើនជាងពលទាហាន។ នេះក៏ដោយសារតែកម្ពុជាបានឆ្លងកាត់ភ្លើងសង្គ្រាម ហើយនាយទាហានជាច្រើនមិនទាន់ដល់អាយុចូលនិវត្តន៍។ សម្តេច ហ៊ុន ម៉ាណែត បានណែនាំទៅរដ្ឋមន្ត្រីក្រសួងការពារជាតិឱ្យដោះស្រាយបញ្ហានេះ។
សម្តេច ហ៊ុន ម៉ាណែត បានកត់សម្គាល់ថា ផែនការបណ្តុះបណ្តាលប្រចាំឆ្នាំ សុទ្ធតែជាការបណ្តុះបណ្តាលនាយទាហាន ដោយមិនមានផែនការបណ្តុះបណ្តាលពលទាហានឡើយ។ សម្តេចសង្កត់ធ្ងន់ថា បើករណីនេះនៅតែបន្ត ៣០ឆ្នាំទៀត ក៏នឹងគ្មានការបណ្តុះបណ្តាលពលទាហានដែរ ដូច្នេះសម្តេចទាមទារឱ្យមានការគិតគូរឡើងវិញ។
បើតាមអ្វីដែលសម្តេចបានលើកឡើង បញ្ហាកន្លងមក គឺដោយសារតែបណ្តាប្រទេសជាមិត្តផ្តល់អាហារូបករណ៍លើការបណ្តុះបណ្តាលនាយទាហាន ហើយថ្នាក់ដឹកនាំស្ថាប័នខ្លាចបាត់បង់អាហារូបករណ៍ទាំងនោះ។ «អត់ទេ យើងត្រូវគិតឡើងវិញ បើនាយទាហានខ្ពស់ជាងនាយទាហានហើយ ត្រូវហ៊ានអារកាត់»។ ប្រមុខរដ្ឋាភិបាល ស្នើឱ្យពិចារណាកាត់ចំនួននាយទាហាន ហើយថវិការើសពលទាហានវិញ ដើម្បីឱ្យស៊ីសង្វាក់តាមស្ថានភាពជាក់ស្តែង។
សម្តេច ហ៊ុន ម៉ាណែត លើកឡើងថា៖ «កុំខ្លាចពាក្យ មិត្តគេកាត់ជំនួយ បើគេឲ្យ៤ឆ្នាំមករៀន តែយើងជាប់បន្ទុក៤០ឆ្នាំ យកមកធ្វើអី្វ? នាយទាហានរៀនមកទៅណា បើគាត់ច្រើនពេក យើងតែងតាំងអត់កើត»។
ទោះបីជាយ៉ាងណាក៏ដោយ សម្តេចនាយករដ្ឋមន្ត្រីបញ្ជាក់ថា អ្វីដែលបានធ្វើកន្លងមកមិនខុសនោះឡើយ ប៉ុន្តែចាំបាច់ឱ្យមានការគិតគូឡើងវិញ ដោយសារផែនការឆ្នាំចាស់ជាផែនការដែលមនុស្សសរសេរ។ សម្តេចណែនាំឱ្យថ្នាក់ដឹកនាំស្ថាប័នចេះពន្យល់ភាគីជាមិត្តវិញ ដោយបង្វែរពីការបណ្តុះបណ្តាលនាយទាហានទៅជាការបណ្តុះបណ្តាលពលទាហាន ពោលគឺគិតគូរលើក្របខណ្ឌអាទិភាព ហើយយកជំនួយដាក់ឱ្យចំគម្រោងផែនការ (Master Plan)៕
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
