ថ្លែងក្នុងជំនួបមួយនៅក្រុង Sochi ដែលស្ថិតនៅជាប់សមុទ្រខ្មៅ ក្នុងថ្ងៃទី៥ ខែតុលា លោកវ្ល៉ាឌីមៀ ពូទីន ប្រធានាធិបតីរុស្ស៊ី បានថ្លែងពីទំនាក់ទំនងរវាងជប៉ុន និងរុស្ស៊ី ដែលបានធ្លាក់ចុះទាបបំផុត ដោយគិតចាប់តាំងពីសង្រ្គាមនៅអ៊ុយក្រែនផ្ទុះឡើងក្នុងឆ្នាំ២០២២។ 

 

ឆ្លើយនឹងសំណួររបស់អ្នកស្រាវជ្រាវមួយរូបរបស់មូលនិធិសន្តិភាព Sasakawa របស់ជប៉ុន  លោកពូទីន បានលើកឡើងថា ជប៉ុនចាំបាច់ត្រូវតែចាត់វិធានការមួយចំនួន ដូចជាដកទណ្ឌកម្មលើរុស្ស៊ី ប្រសិនបើខ្លួនចង់ស្តារទំនាក់ទំនងទ្វេភាគីឡើងវិញ។ ត្រង់ចំណុចនេះ មេដឹកនាំរុស្ស៊ី បានអះអាងថា រុស្ស៊ីមិនបានដាក់ទណ្ឌកម្មលើជប៉ុន ហើយក៏មិនបិទទ្វារចរចាដែរ។ 

 

បើតាមលោកពូទីន វាតែងតែល្អ ក្នុងការមានកិច្ចចរចា ប្រសិនបើក្រុងតូក្យូគិតថា ដល់ពេលសម្រាប់ចរចាប្រកបដោយខ្លឹមសារ។ នេះបើតាមការចុះផ្សាយរបស់សារព័ត៌មាន The Japan Times។ 

 

គួររំឭកថា កន្លងមក ជប៉ុន បានសម្រេចដាក់ទណ្ឌកម្មលើ រួមទាំងបង្កកទ្រព្យសម្បត្តិលើបុគ្គល និងក្រុមហ៊ុន ដែលមានពាក់ព័ន្ធនឹងក្រុមហ៊ុនពាក់ព័ន្ធយោធារបស់រុស្ស៊ី ដើម្បីឆ្លើយតបនឹងការឈ្លានពានរបស់រុស្ស៊ីលើអ៊ុយក្រែន៕