ប្រធានសមាគមលោក វ៉ាន់ អៀន បានឱ្យដឹងថា បច្ចុប្បន្នសមាគមមានកសិករកំពុងដាំដំណាំត្រសក់ផ្អែម និងឪឡឹកសាច់លឿងប្រមាណ១០០គ្រួសារ ដែលអាចផ្គត់ផ្គង់ទីផ្សារប្រចាំថ្ងៃ ចន្លោះពី៥០០គីឡូក្រាម ទៅ៣តោន។ លោកបន្ថែមថា សមាគមប្រឹងប្រែងដើម្បីជ្រោមជ្រែងកសិករឱ្យដាំតាមស្ដង់ដារ ដែលទីផ្សារ ចង់បាន។ លោក វ៉ាន់ អៀន ណែនាំឱ្យកសិករដទៃទៀត ដែលចង់ដាំដំណាំខាងលើនេះ ពង្រឹងគុណភាព និងតម្លៃ ដើម្បីប្រកួតប្រជែងនឹងផលិតផលនាំចូលពីក្រៅ។ 

 

តាមអ្នកជំនាញកសិកម្មរូបនេះ ភូមិសាស្រ្តដែលដាំត្រសក់ផ្អែម និងឪឡឹកលឿងបានល្អ គឺនៅក្រុងសំរោង ស្រុកអន្លង់វែង និងស្រុកត្រពាំងប្រាសាទនៃខេត្តឧត្តរមានជ័យ ស្រុកអង្គរបុរី ស្រុកថ្មពួក នៃខេត្តបន្ទាយមានជ័យ ស្រុករតនៈមណ្ឌល ស្រុកកំរៀង នៃខេត្តបាត់ដំបង តំបន់ខ្លះនៃខេត្តប៉ៃលិន ចំណែកនៅខេត្តសៀមរាប មាននៅស្រុកពួក សូទ្រនិគម ជីក្រែង និងស្រុកអង្គរធំ៕