អន្តរជាតិ
មនុស្ស១៤,០០០នាក់ ផ្លាស់ទីលំនៅដោយសារជំនន់ភ្លៀងនៅមីយ៉ាន់ម៉ា
× ប្រជាជនក្នុងទីក្រុងបាហ្គោរបស់មីយ៉ាន់ម៉ា បានរៀបចំស្បៀងអាហារ និងរបស់របរចាកចេញពីផ្ទះរបស់ពួកគេ ខណៈទីក្រុងនេះត្រូវបានជន់លិចដោយទឹកជំនន់នាថ្ងៃទី១០ ខែតុលា បន្ទាប់ពីភ្លៀងធ្លាក់ខ្លាំងក្នុងកម្រិតមិនធ្លាប់មាន។ បើតាមអាជ្ញាធរ មនុស្ស១៤,០០០នាក់ ត្រូវបង្ខំចិត្តផ្លាស់ទីលំនៅ។
នៅទីក្រុងបាហ្គោភាគខាងកើតមីយ៉ាន់ម៉ាទី ដែលទឹកភ្លៀងដ៏ខ្លាំងបង្កជាទឹកជំនន់ អ្នកស្រុកបានដើរតាមផ្លូវដែលលិចក្រោមទឹកជ្រៅ ឬធ្វើដំណើរតាមទូក ឬលើសំបកកង់កៅស៊ូ។
«នេះជាលើកទីមួយហើយដែលផ្ទះរបស់ខ្ញុំ ត្រូវទឹកលិចក្នុងជីវិតរបស់ខ្ញុំ»។ លោកស្រី Phwar Than Hme អាយុ១០១ឆ្នាំ បានប្រាប់ទីភ្នាក់ងារព័ត៌មាន AFP ពីវត្តដែលលោកស្រី កំពុងស្នាក់នៅបណ្ដោះអាសន្ន ដើម្បីគេចចេញពីទឹកជំនន់។
កាលពីថ្ងៃទី៨ ខែតុលា អាជ្ញាធរមីយ៉ាន់ម៉ា បានរាយការណ៍ពីភ្លៀងធ្លាក់២០០មីលីម៉ែត្ រក្នុងរយៈពេល២៤ម៉ោងមុន នៅក្នុងតំបន់បាហ្គោ ដែលជាកំណត់ត្រាសម្រាប់ខែតុលា។ ភ្លៀងធ្លាក់ខ្លាំង បានបន្តរហូតដល់យប់ថ្ងៃទី៩ ខែតុលា។
ទូរទស្សន៍រដ្ឋមីយ៉ាន់ម៉ា MRTV ក៏រាយការណ៍ថា មនុស្ស១៤,០០០នាក់ត្រូវបានផ្លាស់ទីលំនៅទូទាំងតំបន់បាហ្គោ ដែលនៅភាគឦសាននៃមជ្ឈមណ្ឌលពាណិជ្ជកម្មយ៉ាំងហ្គោន។ ចំណែកបើតាមកាសែតរដ្ឋ Global New Light of Myanmar មនុស្សជិត ៥,៦០០នាក់ កំពុងស្នាក់នៅក្នុងមជ្ឈមណ្ឌលផ្តល់ជំនួយបណ្តោះអាសន្ន របស់រដ្ឋាភិបាលក្នុងតំបន់។ ជាមួយគ្នានេះ ប្រព័ន្ធគមនាគមន៍ក៏រអាក់រអួលដែរ។
ក្នុងខែកក្កដា ទឹកជំនន់ក៏បានប៉ះពាល់ដល់រដ្ឋ និងតំបន់ចំនួនប្រាំបួនរបស់មីយ៉ាន់ម៉ា រួមមាន រ៉ាឃីន កាឈីន ការ៉ែន មន និងឈិន ស្របពេលដែលប្រទេសនេះ កំពុងស្ថិតជម្លោះស៊ីវិលដ៏បង្ហូរឈាមនៅឡើយ៕
© រក្សាសិទ្ធិដោយ thmeythmey.com