លោក Phairoj Chotikasatien លេខាធិការអចិន្រ្តៃយ៍នៃក្រសួងការងាថៃរ បានអះអាងថា ថៃបានបង្កើតបន្ទប់តាមដានព័ត៌មានសង្រ្គាមនៅអ៊ីស្រាអែល ដើម្បីតាមដានជម្លោះរវាងអ៊ីស្រាអែល និងក្រុមហាម៉ាស ក៏ដូចជាសម្រាប់ជូនដំណឹងដល់ក្រុមគ្រួសារជនរងគ្រោះ។ 

 

បើតាមមន្រ្តីក្រសួងការងាររូបនេះ ប្រជាជនថៃ ដែលរងផលប៉ះពាល់ដោយសារតែសង្រ្គាម នឹងទទួលបានការធានារ៉ាប់រងអាយុជីវិតប្រភេទ Premiums នៅអ៊ីស្រាអែល ខណៈពលកររងរបួស នឹងទទួលបានការព្យាបាលដោយឥតគិតថ្លៃរហូតដល់ជាសះស្បើយពីជំងឺ។ នេះបើតាមការចុះផ្សយរបស់សារព័ត៌មាន The Nation។ 

 

លេខាធិការអចិន្រ្តៃយ៍នៃក្រសួងការងារថៃរូបនេះ បានបន្តថា ពលកររងរបួស នឹងទទួលបានប្រាក់ប្រមាណ ៤១០ដុល្លារ (១៥០០០បាត) ហើយពលករពិការ នឹងទទួលបាន ៨២១ដុល្លារ (៣០០០០បាត)។ ចំណែកប្រជាជនថៃបាត់បង់ជីវិតក្នុងសង្រ្គាមមួយនេះ នឹងទទួលបានប្រាក់ជិត ១១០០ដុល្លារ (៤០០០០បាត)។ 

 

ស្របគ្នានេះ លោក Phairoj បានអះអាងថា សំណងចំពោះជនរងគ្រោះ នឹងត្រូវបានកែប្រែ ដោយផ្អែកលើហានិភ័យការងារ និងការរងរបួសរបស់ពលករ ដូចបទបញ្ញត្តិ ដែលថៃបានអនុម័តនៅជាច្រើនឆ្នាំមុន។ 

 

មិនតែប៉ុណ្ណោះ លោក ​Phairoj បានបន្ថែមថា ក្រសួងការងារ នឹងធ្វើការជាមួយក្រសួងការបរទេស ដើម្បីនាំប្រជាជនថៃត្រលប់មកវិញ ហើយនឹងរៀបចំបុគ្គលដែលមិនចង់ត្រលប់មកប្រទេសវិញឱ្យធ្វើការនៅតំបន់មានសុវត្ថិភាព។ 

 

ប្រជាជនថៃប្រមាណ ៣ម៉ឺននាក់ កំពុងធ្វើការនៅអ៊ីស្រាអែល។ តាមការបញ្ជាក់របស់លោកស្រី Kanchana Patarachoke អ្នកនាំពាក្យក្រសួងការបរទេសថៃ ពលករថៃប្រមាណ៥ពាន់នាក់ បានធ្វើការនៅក្នុងតំបន់ជម្លោះក្បែរព្រំដែនកាហ្សាតែម្ដង ហើយជនជាតិថៃចំនួន ៣២២៦នាក់ បានចុះឈ្មោះត្រលប់មកប្រទេសវិញ។ 

 

ចំណែកអនុរដ្ឋមន្រ្តីការបរទេសថៃ លោក Jakkapong Sangmanee បានអះអាងថា ការជម្លៀសប្រជាជនថៃ គឺផ្អែកតាមជើងហោះហើរពិសេស និងជើងហោះហើរពាណិជ្ជកម្ម។ ចំណែកយន្តហោះយោធាថៃ មិនត្រូវបានអនុញ្ញាតឱ្យចុះចតនៅអ៊ីស្រាអែលឡើយ ខណៈការវាយប្រហារ កំពុងកើតមាននៅក្បែរអាកាសយានដ្ឋាន។ 

 

ប្រជាជនថៃប្រមាណ១៥នាក់ ត្រូវបានរំពឹងថា នឹងត្រលប់មកថៃជាលើកដំបូង នៅថ្ងៃទី១១ ខែតុលា ហើយមនុស្សចំនួន ១៤០នាក់ នឹងត្រលប់មកពីអ៊ីស្រាអែលវិញ នៅថ្ងៃទី១៤ ខែតុលា។

 

ខណៈសង្រ្គាមឈានចូលដល់ថ្ងៃទី៥ អ្នកស្លាប់នៅក្នុងសង្រ្គាមអ៊ីស្រាអែល-ហាម៉ាស កើនដល់ជាង ២ពាន់នាក់ ដោយអ៊ីស្រាអែល មានប្រមាណ ១២០០នាក់ និងបាឡេស្ទីន កើនដល់ ៩០០នាក់៕