ថៃនឹងអនុញ្ញាតឲ្យជនជាតិរុស្ស៊ីចូលមកលេងកំសាន្តក្នុងរយៈពេលយូរជាងបច្ចុប្បន្នរហូតដល់ ៩០ថ្ងៃដើម្បីជំរុញកំណើនសេដ្ឋកិច្ចក្នុងស្រុក។ នេះបើតាមរដ្ឋមន្រ្តីក្រសួងទេសចរណ៍ និងកីឡាថៃលោក Sudawan Wangsuphakijkosol ។

 

ជនជាតិរុស្ស៊ី៩២៣ ១១៣នាក់បានទៅលេងថៃក្នុងរយៈពេល៨ខែឆ្នាំនេះ​ ដោយជាប់ចំណាត់ថ្នាក់លេខ​ ៥ តាមពីក្រោយភ្ញៀវមកពីម៉ាឡេស៊ី ចិន កូរ៉េខាងត្បូង និងឥណ្ឌា។ មុនពេលរាលដាលជំងឺកូវីដ-១៩ កាលពីឆ្នាំ២០១៩ ជនជាតិរុស្ស៊ីប្រមាណ ១,៥លាននាក់បានទៅលេងថៃដោយចំណាយប្រាក់ ៣,៣ពាន់លានដុល្លារ ដែលជាភ្ញៀវចំណាយច្រើនជាងគេលំដាប់ទីបី។ 

 

រដ្ឋាភិបាលថៃកំពុងពឹងផ្អែកលើវិស័យទេសចរជាចម្បងដើម្បីបង្កើនកំណើនសេដ្ឋកិច្ច បើទោះបីមានឧប្បត្តិហេតុនៃការបាញ់ប្រហារនាពេលថ្មីនេះៗនេះនៅក្នុងផ្សារទំនើបបាងកក ដែលអាចរារាំងការអំពាវនាវឲ្យភ្ញៀវទេសចរចិនមួយចំនួនក៏ដោយ។ 

 

អ្នកដំណើរជនជាតិចិនប្រមាណ៥៩០ពាន់នាក់បានបញ្ជាក់កក់ជើងហោះហើរ និងសណ្ឌាគារទៅថៃគិតត្រឹមថ្ងៃ១៤ ខែតុលា ពោលគឺធ្លាក់ចុះពី ៦៥០ពាន់នាក់ដែលបានកក់មុនពេលមានការបាញ់ប្រហារនៅផ្សារទំនើប។ នេះបើតាមអ្នកនាំពាក្យរដ្ឋាភិបាលថៃលោក Chai Wacharonke។ 

 

ថៃត្រូវបានគេព្យាករថា នឹងទទួលភ្ញៀវទេសចររហូតដល់ ៣០លាននាក់នៅឆ្នាំនេះ ដែលច្រើនជាងទ្វេដងធៀបឆ្នាំ២០២២៕​