បើតាមសេចក្តីប្រកាសរបស់ RDIF ការបង្កើតមូលនិធិអភិវឌ្ឍន៍វិស័យអាកាសចរណ៍ស៊ីវិលដែលមានតម្លៃ១០០ពាន់លានរូប្លិ៍ រួមជាមួយដៃគូមកពីចិន គឺដើម្បីវិនិយោគលើសហគ្រាសអាកាសចរណ៍ និងគម្រោងនានារវាងប្រទេសទាំងពីរ។ ការវិនិយោគលើគម្រោងនានាទាំងនៅរុស្ស៊ី និងចិនត្រូវធ្វើឡើងជារូបិយប័ណ្ណជាតិរបស់ខ្លួន និងបរិមាណទឹកប្រាក់ស្មើគ្នា។ 

 

ការបង្កើតមូលនិធិខាងលើដោយ RDIF ត្រូវបានធ្វើឡើងនៅក្នុងដំណើរទស្សនកិច្ចប្រធានាធិបតីរុស្ស៊ី វ៉្លឌីមៀ ពូទីន ដើម្បីចូលរួមវេទិកាខ្សែក្រវាត់​និងផ្លូវលើកទី៣ នៅទីក្រុងប៉េកាំង។ មូលនិធិនេះនឹងវិនិយោគលើគម្រោងលំហអាកាស បច្ចេកវិទ្យាឌីជីថល ថាមពលដែលមានប្រសិទ្ធភាពខ្ពស់ និងទិន្នន័យធំៗ។

 

កន្លងមក RDIF ដែលជាផ្នែកមួយនៃកិច្ចសហប្រតិបត្តិការវិនិយោគជាមួយចិន បានអនុវត្តជាង ៤០គម្រោងរួចហើយដែលមានតម្លៃជាង ៧៥០ពាន់លានរូប្លិ៍។

 

គម្រោង​យន្តហោះ​ដែលហោះ​ហើរបានចម្ងាយ​ឆ្ងាយ​របស់​រុស្ស៊ី-ចិន ​រំពឹងថា​នឹង​ប្រជែង​ជាមួយ​យន្តហោះ A330 និង​យន្តហោះ Boeing 777 បានចាប់ផ្តើម​ដំឡើងនៅ​ខែមេសា ឆ្នាំ ២០១៤។

 

គម្រោងនេះត្រូវបានអនុវត្តដោយសាជីវកម្មយន្តហោះទូទៅដែលជាផ្នែកមួយនៃក្រុមហ៊ុនបច្ចេកវិទ្យាយក្សរុស្ស៊ី Rostec និងក្រុមហ៊ុន COMAC របស់ចិន។ នៅឆ្នាំ ២០១៧ គម្រោងនេះត្រូវបានគេដាក់ឈ្មោះថា CR 929 ។ 

 

នេះមិនមែនជាលើកទីមួយទេ ដែលរុស្ស៊ី និងចិនបានបង្កើតមូលនិធិវិនិយោគរួមគ្នា។ ក្នុងឆ្នាំ២០១៥  RDIF និង China Construction Bank បានយល់ព្រមបង្កើតមូលនិធិមួយដែលមានផែនការវិនិយោគ ២០ពាន់លានដុល្លារនៅក្នុងសេដ្ឋកិច្ចរុស្ស៊ី៕​