ព្រះសង្ឃវត្តអារញ្ញ នៅបណ្តោយស្ទឹងសៀមរាប តែងចែកម្ហូបដែលហូរហៀពេលបុណ្យជូនអ្នកខ្វះខាត

ជាតិ

សង្គមជាតិ

ព្រះសង្ឃវត្តអារញ្ញ នៅបណ្តោយស្ទឹងសៀមរាប តែងចែកម្ហូបដែលហូរហៀពេលបុណ្យជូនអ្នកខ្វះខាត

19, Oct 2023 , 6:59 pm

រូបភាព

ដោយ៖ ថោង ប្រណី

សៀមរាប៖ ជារៀងរាល់ឆ្នាំ ក្រោយពេលបញ្ចប់ពិធីបុណ្យភ្ជុំបិណ្ឌ តាមបណ្ដាទីវត្តអារាមភាគច្រើន សម្បូរទៅដោយម្ហូបអាហារសេសសល់ដូច្នេះហើយព្រះសង្ឃ និងគណៈកម្មការវត្តទាំងអស់នោះ បានរៀបចំចាត់ចែងយកជូនញាតិញោមពុទ្ធបរិស័ទ ជិតឆ្ងាយតាម ដែលអាចធ្វើទៅបាន។ វត្តអារញ្ញសាគរ ដែលមានទីតាំងស្ថិតនៅតាមបណ្ដោយស្ទឹងសៀមរាប ក៏បានចាត់ចែងចង្ហាន់ដែលនៅសេសសល់នោះ ចែកជូនដល់ប្រជាពលរដ្ឋដែលមានជីវភាពខ្វះខាតក្នុងក្រុងសៀមរាប។

តទៅនេះសូមលោកអ្នកនាងទស្សនាវីដេអូដូចខាងក្រោម៖

ព្រះគ្រូចៅអធិការវត្តអារញ្ញ ព្រះនាម ហ៊ាក់ គឹមហ៊ត់ មានសង្ឃដីកាថា ម្ហូបអាហារជាច្រើនមុខដែលពុទ្ធបរិស័ទនិយមយកមកប្រគេនព្រះសង្ឃ នៅរដូវបុណ្យភ្ជុំបិណ្ឌនេះមានដូចជា ស្ងោរចាប់ឆាយ ហុង ឆាមីសួរ ឆាមី និងអន្សមជ្រូកអន្សមចេកជាដើម មានហូរហៀរាល់ឆ្នាំ ដូច្នេះហើយព្រះអង្គក៏បានចាត់ចែងឲ្យគណៈកម្មការវត្តយកទៅចែកជូនដល់ពលរដ្ឋដែលខ្វះខាតម្ហូបអាហារហូបចុក នៅសង្កាត់ចុងឃ្នៀស និងសង្កាត់សៀមរាបនៅបរិវេណជុំវិញភ្នំក្រោម។

ព្រះតេជគុណបន្ថែមថា ក្រៅពីពិធីបុណ្យភ្ជុំបិណ្ឌនេះ នៅរដូវបុណ្យចូលឆ្នាំ ព្រះអង្គរៀបចំឱ្យមានការវេចខ្ចប់ម្ហូបអាហារ ដាក់ក្នុងប្រអប់ស្នោដើម្បីយកទៅជូនដល់ពលរដ្ឋដែលមកពីទីជិតឆ្ងាយនៅតាមមន្ទីរពេទ្យគន្ធបុប្ផា មន្ទីរពេទ្យកុមារអង្គរ មន្ទីរពេទ្យបង្អែកខេត្តសៀមរាប ជាពិសេសនៅពន្ធនាគារខេត្តសៀមរាប។

តេជគុណម្ចាស់មានសង្ឃដីកាទៀតថា សកម្មភាពនេះកើតឡើងពីសេចក្តីជ្រះថ្លារបស់ពុទ្ធបរិស័ទ ក៏ដូចជាការយកចិត្តទុកដាក់ពីព្រះសង្ឃ ចំពោះអ្នកដែលមានជីវភាពខ្វះខាត។ ព្រះ អង្គសង្ឃឹមដែរថា សកម្មភាពចែករំលែកនឹងរីកសាយទៅដល់វត្តអារាមផ្សេងៗទៀតដែរ៕