«ភាគីទាំងពីរគួរតែខិតខំប្រឹងប្រែងដើម្បីលើកកម្ពស់ទីក្រុងកំពង់ផែ Colombo និង Hambantota»។ លោក ស៊ី ជិនភីង និយាយបែបនេះទៅកាន់លោក រ៉ានីល វីក្រេមេស៊ីងហ្កេ ដោយសំដៅលើគម្រោងធំៗ ដែលចិនបានគាំទ្រក្រោមគំនិតផ្ដួចផ្ដើមខ្សែក្រវាត់ និងផ្លូវ។

 

ជាមួយគ្នានេះ លោក ស៊ី ក៏បានបន្ថែមថា ចិនមានឆន្ទៈក្នុងការបន្តផ្តល់ជំនួយដល់ស្រីលង្កាដោយឥតលក្ខខ័ណ្ឌនយោបាយ ដើម្បីជួយប្រទេសទប់ទល់នឹងការលំបាកដែលខ្លួនកំពុងជួបប្រទះ។ លើសពីនេះ ចិនក៏ឆន្ទៈពង្រីកការនាំចូលផលិតផលរបស់ស្រីលង្កា ហើយលើកទឹកចិត្តសហគ្រាសចិនឱ្យវិនិយោគនៅប្រទេសនេះបន្ថែម។

 

លោក វីក្រេមេស៊ីងហ្កេ បានទៅដល់រដ្ឋធានីប៉េកាំងដើម្បីចូលរួមវេទិកាខ្សែក្រវាត់ និងផ្លូវដែលបានបញ្ចប់ទៅកាលពីថ្ងៃទី១៨ ខែតុលា ហើយលោកក៏បន្តពិភាក្សាស្តីពីការរៀបចំរចនាសម្ព័ន្ធបំណុលឡើងវិញជាមួយចិនផងដែរ។ ទីក្រុងប៉េកាំង ជាម្ចាស់បំណុលមួយរបស់ទីក្រុងកូឡុំបូ។

 

ស្រីលង្កាបានប្រកាសកាលពីថ្ងៃទី១២ ខែតុលាថាថា ខ្លួនបានសម្រេចកិច្ចព្រមព្រៀងជាមួយធនាគារនាំចេញ-នាំចូលរបស់ចិនលើបំណុលចំនួន៤,២ពាន់លានដុល្លារ។