បន្ទាប់ពីការលេចធ្លាយនាំឱ្យមានការបិទបំពង់ប្រេង Balticconnector កាលពីថ្ងៃទី៨ ខែតុលា អាជ្ញាធរហ្វាំងឡង់ កំពុងស៊ើបអង្កេតការខូចខាតដែលប៉ូលិសសង្ស័យថាបណ្តាលមកពីសកម្មភាពខាងក្រៅ។

 

«ចលនារបស់នាវា Newnew Polar Bear បង្ហាញទង់ទីក្រុងហុងកុង ស្របពេលជាមួយនឹងវេលា និងទីកន្លែងនៃការខូចខាតបំពង់បង្ហូរឧស្ម័ន»។ ការិយាល័យស៊ើបអង្កេត ជាតិហ្វាំងឡង់បានបញ្ជាក់ក្នុងសេចក្តីថ្លែងការណ៍មួយបែបនេះរួចបន្តដោយស្រង់សម្តី អគ្គនាយកស៊ើបអង្កេតលោក Risto Lohi ថា ពួកគេនឹងសហការជាមួយអាជ្ញាធរចិន ដើម្បីសិក្សាពីនាវានេះ។

 

ប៉ូលិសហ្វាំងឡង់ក៏បានបញ្ជាក់ផងដែរថា ការខូចខាតនេះបណ្តាលមកពីកម្លាំងមេកានិចខាងក្រៅ។ពួកគេបានរកឃើញវត្ថុធ្ងន់ម្យ៉ាងនៅជិតបំពង់ដែលខូច។ ប៉ូលិសនឹងព្យាយាមលើកវត្ថុនោះចេញពីបាតសមុទ្រដើម្បីស៊ើបអង្កេតថាតើវាទាក់ទងទៅនឹង បំពង់ដែលខូចឬអត់។

 

គួរបញ្ជាក់ថា ឧស្ម័នធម្មជាតិមានប្រហែល៥ភាគរយនៃប្រភពថាមពលរបស់ហ្វាំងឡង់ ដែលភាគច្រើនត្រូវបានប្រើប្រាស់ក្នុងឧស្សាហកម្ម និងការផលិតកំដៅ និងថាមពលរួមបញ្ចូល គ្នា៕