លោក គង់ ច័ន្ទវាសនា បានណែនាំឱ្យមន្ត្រី បើកវគ្គបណ្តុះបណ្តាលដល់អ្នកលក់ធាតុចូលកសិកម្ម និងពង្រឹងការផ្សព្វផ្សាយដល់កសិករ លើការប្រើប្រាស់ធាតុចូលកសិកម្មឱ្យត្រឹមត្រូវ តាមបទដ្ឋានបច្ចេកទេស។
 

ជាមួយគ្នានេះ លោក ជំរុញឱ្យមន្រ្តីទាំងអស់ ត្រូវយកចិត្តទុកដាក់ទប់ស្កាត់ការនាំធាតុចូលកសិកម្មខុសច្បាប់ ជាពិសេសនៅតាមបណ្តាខេត្តជាប់ព្រំដែន។ មិនតែប៉ុណ្ណោះ ការលក់ផលិតផលតាមអនឡាញ( Online) មិនមានចុះបញ្ជីការ, ការក្លែងបន្លំគុណភាព ដែលនាំឱ្យមានការប៉ះពាល់សុខភាព បរិស្ថាន និងបញ្ហាផ្សេងៗ ក៏ត្រូវត្រួតពិនិត្យ និងទប់ស្កាត់ផងដែរ។ រដ្ឋលេខាធិការកសិកម្មរូបនេះ ក៏បានណែនាំឱ្យពិនិត្យលទ្ធភាពលើសុពលភាពបញ្ជីការ ឱ្យលើសពី ៣ឆ្នាំទៀតផង។
 

«ជាយន្តការអគ្គនាយកដ្ឋានកសិកម្មត្រូវសិក្សាបន្ថែម និងត្រូវការសហការគ្នាល្អទាំងថ្នាក់ជាតិនិងថ្នាក់ក្រោមជាតិ និងត្រូវមានរបបរបាយការណ៍ប្រចាំខែច្បាស់លាស់ត្រឹមត្រូវ តាមដានការត្រួតពិនិត្យ និងផ្សព្វផ្សាយអំពីច្បាប់និងធាតុចូលកសិកម្ម ដល់អាជីវករនិងកសិករអ្នកប្រើប្រាស់ឱ្យបានទូលំទូលាយ ដើម្បីអនុវត្តការងារគ្រប់គ្រងថ្នាំកសិកម្ម និងជីកសិកម្មនេះឱ្យបានល្អបំផុត»។ នេះបើតាមលោក វាសនា។
 

មន្ត្រីជាន់ខ្ពស់នៃក្រសួងកសិកម្មរូបនេះ ក៏ជំរុញឱ្យមន្រ្តី ផ្ដោតការយកចិត្តទុកដាក់លើការធានាសន្តិសុខស្បៀង គុណភាពផលិតផល និងស្ថិរភាពតម្លៃក្នុងខ្សែច្រវាក់តម្លៃល្អ ។ ជាពិសេសការជំរុញសហគមន៍កសិកម្មតាមគម្រូថ្មី ព្រមទាំងការដាក់ពង្រាយមន្ត្រីផ្សព្ចផ្សាយកសិកម្មឃុំ ដើម្បីជួយដល់កសិករ ក្នុងការកាត់បន្ថយថ្លៃដើមផលិតកម្ម និងបង្កើនប្រាក់ចំណេញ៕