ជាតិ
ក្រសួងអប់រំ និងក្រុមហ៊ុន META ដាក់ដំណើរការកម្មវិធីសិក្សាអក្ខរកម្មឌីជីថលតាមសាលារដ្ឋ រូបភាព៖ Moeys Cambodia
× ភ្នំពេញ៖ ក្រសួងអប់រំ យុវជន និងកីឡា និងក្រុមហ៊ុន Meta សហការជាមួយអង្គការសកម្មភាពកម្ពុជាដើម្បីលើកកម្ពស់ការអប់រំ (KAPE) បានរួមគ្នាដាក់ដំណើរការជាផ្លូវការ នូវកម្មវិធីអក្ខរកម្មឌីជីថលខ្មែរ (Khmer Digital Literacy Program)។ កម្មវិធីនេះ បង្កើតឡើងក្នុងគោលបំណងជួយអភិវឌ្ឍជំនាញដែលត្រូវការ ជាពិសេសជំរុញឱ្យពលរដ្ឋមានទំនួលខុសត្រូវ ការគិតបែបស៊ីជម្រៅ និងការប្រាស្រ័យទាក់ទង តាមឌីជីថល។
ក្រសួងអប់រំ និងក្រុមហ៊ុន META រួមជាមួយអង្គការដៃគូ KAPE បានដាក់សម្ពោធជាផ្លូវការនូវ វិធីអក្ខរកម្មឌីជីថលខ្មែរ នាថ្ងៃទី២៣ ខែតុលា នៅសណ្ឋាគារ ហៃយ៉ាត់ រីជើនស៊ី ភ្នំពេញ។ កម្មវិធីសិក្សានេះ គឺជាផ្នែកមួយនៃកម្មវិធីអក្ខរកម្ម ដែលត្រូវបានបង្កើតឡើងដោយក្រុមហ៊ុន Meta (Facebook) ក្នុងឆ្នាំ២០២២។
កម្មវិធីអក្ខរកម្មឌីជីថលខ្មែរមាន ៤ ផ្នែក សម្រាប់សិស្សថ្នាក់ទី ៧ ដល់ទី ៩ រួមមាន ការណែនាំអំពីការរៀន បែបឌីជីថល មូលដ្ឋានគ្រឹះឌីជីថល សុខាមាលភាពឌីជីថល និងការចូលរួមបែបឌីជីថល។ ចំពោះ គ្រូបណ្តុះបណ្តាលនឹងត្រូវបង្រៀនសិស្សក្នុងសាលាគោលដៅ ជាមួយនឹងឯកសារតាមកម្មវិធីអក្ខកម្មឌីជីថល ។ កម្មវិធីនេះក៏ផ្តល់ការសិក្សាទៅដល់សិស្ស ពី ៣០០០ ទៅ ៥០០០នាក់ហើយ ក្នុងរយៈពេល៦ខែ នៃការសាកល្បងកម្មវិធីសិក្សាឌីជីថលថ្មីនេះ ចាប់ពីខែមករា ដល់ខែមិថុនា ឆ្នាំ ២០២៣។
ការដាក់ឲ្យដំណើរការនេះ មានការចូលរួមពីតំណាងក្រសួងអប់រំ យុវជន និងកីឡា អង្គការសកម្មភាពលើកកម្ពស់ការអប់រំ អង្គការក្រៅរដ្ឋាភិបាលក្នុងស្រុកនិងអន្តរជាតិ សាលារៀនជំនាន់ថ្មី និងសហគមន៍ អប់រំ រួមទាំងសាលារដ្ឋផ្សេង ទៀត ដែលជាផ្នែកមួយនៃកម្មវិធីសិក្សាថ្មី។
Tag:
ThmeyThmey
អប់រំ
អក្ខរកម្មឌីជីថលខ្មែរ
META
© រក្សាសិទ្ធិដោយ thmeythmey.com