ជាតិ
ពីនេះ ពីនោះ
«កុន» មានន័យផ្សេងគ្នា ដូចជា កល, ភាពយន្ត ឬខកដំណើរ
× ពាក្យ «កុន» មានសេចក្តីពន្យល់បីបែបផ្សេងៗគ្នា។ នេះបើតាមវចនានុក្រមខ្មែរ២០២២របស់ក្រុមប្រឹក្សាជាតិភាសាខ្មែរនៃរាជបណ្ឌិត្យសភាកម្ពុជា ក៏ដូចជាវចនានុក្រមខ្មែរសម្តេចព្រះសង្ឃរាជ ជួន ណាត។
«កុន» [ន.] មានន័យថា កល, កលឧបាយ : ជាប់កុន, ដោះកុន, រួចពីកុន។ វចនានុក្រម ក៏តម្រូវឱ្យមើលពាក្យ «កល» បន្ថែមផងដែរ។ កល់ គឺឧបាយយ៉ាងល្អិត, ល្បិច (ឧបាយកល) : ដំណើរហ្នឹងជាកលឧបាយរបស់គេទេ; ប្រយ័ត្នចាញ់កលគេ។
ន័យទីពីរ «កុន» [ន.] ជាឈ្មោះល្បែងដែលលេងដោយទំនងកលឧបាយផ្សេងៗ។ ពាក្យនេះខ្មែរហៅតាមសៀម ដែលសរសេរ "កល" តែអានថា "កុន" ខ្មែរយកពាក្យ កុន នេះមកប្រើ ក៏ទៅជាមានពាក្យពីរផ្សេងគ្នាគឺ កល ១កុន ១ក្នុងសម័យបច្ចុប្បន្នខ្មែរយើងហៅ ភាពយន្ត : លេងកុន, ទៅមើលកុន។
«កុន» មួយទៀត ជាកិរិយាសព្ទ ដែលមានន័យថា ខក ឬស្កុនដំណើរ ព្រោះដេកលក់ជ្រុលហួសវេលា : ខ្ញុំកុនដំណើរ ទៅមិនទាន់កប៉ាល់៕
© រក្សាសិទ្ធិដោយ thmeythmey.com