ជាតិ
នយោបាយជាតិ
×![]()
ដោយ: រួបរួម
អតីតប្រមុខរដ្ឋាភិបាលចិន លោក លី ខឹឈាំង បានទទួលមរណភាពក្នុងអាយុ៦៨ឆ្នាំ ដោយជំងឺគាំងបេះដូង កាលពីយប់ឈានចូលថ្ងៃទី២៧ ខែតុលា នៅក្រុងសៀងហៃ។ «កម្ពុជាបានបាត់បង់មិត្តដ៏ល្អម្នាក់របស់ខ្លួន ហើយលោកស្ថិតក្នុងការចងចាំជានិច្ចរបស់កម្ពុជា និងពលរដ្ឋកម្ពុជា»។ នេះបើតាមខ្លឹមសារនៃលិខិតរំលែកទុក្ខដាច់ដោយឡែក ដែលសម្តេច ហ៊ុន សែន ក្នុងនាមប្រធានគណបក្សប្រជាកម្ពុជាផ្ញើជូនលោកប្រធានាធិបតី ស៊ី ជិនពីង ដែលជាអគ្គលេខាធិការនៃគណកម្មាធិការមជ្ឈឹមបក្សកុម្មុយនីស្តចិន រីឯសម្តេចនាយករដ្ឋមន្ត្រី ហ៊ុន ម៉ាណែត ផ្ញើទៅសមភាគីចិន លោក លី ឈាង។
«មរណភាពរបស់ឯកឧត្តម [លី ខឹឈាំង] តំណាងឱ្យការបាត់បង់ដ៏ធំមួយសម្រាប់ប្រជាជនចិន និងបក្ស»។ សម្តេច ហ៊ុន សែន សម្តែងការសោកស្តាយ ដោយបានអះអាងថា បុរសរដ្ឋចិន ដែលជាមិត្តដ៏ល្អរបស់កម្ពុជារូបនេះ ស្ថិតក្នុងការចងចាំជានិច្ច ព្រោះលោកបានរួមចំណែកយ៉ាងសំខាន់ចំពោះទំនាក់ទំនងប្រទេសជាតិ និងនយោបាយដ៏រឹងមាំរបស់គណបក្សទាំងពីរ។
ដូចគ្នាផងដែរ សម្តេចនាយករដ្ឋមន្ត្រី ហ៊ុន ម៉ាណែត បានចាត់ទុកលោក លី ខឹឈាំង ជាឥស្សរជននយោបាយដ៏លេចធ្លោមួយរូបក្នុងប្រវត្តិសាស្ត្រចិន ហើយលោកស្ថិតក្នុងការចងចាំជានិច្ចក្នុងនាមជាមិត្តដ៏ល្អរបស់កម្ពុជា។
សម្តេច ហ៊ុន ម៉ាណែត បានរំលឹកពីដំណើរទស្សនកិច្ចមកកាន់កម្ពុជារបស់អតីតនាយករដ្ឋមន្ត្រីចិនរូបនេះ កាលពីអំឡុងឆ្នាំ២០១៨ និងឆ្នាំ២០២២ ដោយមានឯកសារនៃកិច្ចសហប្រតិបត្តិការជាច្រើនត្រូវបានចុះហត្ថលេខា ក្នុងនោះមានដូចជាផ្នែកហេដ្ឋារចនាសម្ព័ន្ធ កសិកម្ម ថាមពល សុខភាព បម្រែបម្រួលអាកាសធាតុ បច្ចេកវិទ្យា ឱសថបុរាណ ការអប់រំជាដើម។
«លោកក៏បានដើរតួនាទីយ៉ាងសកម្មក្នុងការចូលរួមជាមួយមេដឹកនាំអាស៊ាន នាអំឡុងកិច្ចប្រជុំអាស៊ាន-ចិន និងកិច្ចប្រជុំអាស៊ានបូកបី»។ នេះជាការកត់សម្គាល់របស់ប្រមុខរដ្ឋាភិបាលកម្ពុជាចំពោះសកម្មភាពរបស់អតីតនាយករដ្ឋមន្ត្រីចិន។
ហេតុការណ៍ស្លាប់របស់លោកលី ត្រូវបានប្រជាជនចិនមួយចំនួន ចាត់ទុកជាការបាត់បង់បុរសសំខាន់មួយនៅក្នុងប្រទេស។ ប្រជាជនចិនមួយរូប បានសរសេរលើបណ្តាញសង្គមថា ការបាត់បង់លោកលី ប្រៀបដូចជាចិន បានបាត់បង់សសរស្ដម្ភមួយរបស់ប្រទេសចិន៕
© រក្សាសិទ្ធិដោយ thmeythmey.com
