ក្រោយខកខានរយៈពេល៤ឆ្នាំដោយសារវិបត្តិកូវីដ-១៩ វេទិការាជរដ្ឋាភិបាល-ផ្នែកឯកជន (G-PSF) លើកទី១៩ នឹងប្រព្រឹត្តទៅនៅថ្ងៃទី១៣ ខែវិច្ឆិកា ខាងមុខ។ នេះនឹងក្លាយជាជំនួបលើកដំបូងផងដែរ ក្រោមការដឹកនាំរបស់សម្តេចនាយករដ្ឋមន្ត្រី ហ៊ុន ម៉ាណែត។ កិច្ចប្រជុំពិភាក្សាពិគ្រោះយោបល់ កិច្ចប្រជុំផ្ទៃក្នុងនៃក្រុមការងារនីមួយៗ ត្រូវបានរៀបចំឡើងជាបន្តបន្ទាប់ នៅមុនវេទិកាថ្នាក់ជាតិ។
សម្តេច ហ៊ុន ម៉ាណែត តែងតែលើកឡើងសារសំខាន់របស់វិស័យឯកជនដែលជាកម្លាំងចលករនៃកំណើនសេដ្ឋកិច្ចជាតិ។ តាមរយៈវេទិការាជរដ្ឋាភិបាល-ផ្នែកឯកជន (G-PSF) លើកទី១៩ សម្តេចអះអាងថា រដ្ឋាភិបាលរង់ចាំស្តាប់នូវមតិយោបល់ និងសំណូមពរនានា ពីវិស័យឯកជននៃកំណើនសេដ្ឋកិច្ច ជាមួយនឹងការត្រៀមដាក់ចេញវិធានការ និងការអនុវត្តជាក់ស្តែងក្នុងការបន្តជំរុញគាំទ្រវិស័យឯកជន។
សម្រាប់រដ្ឋាភិបាលអណត្តិថ្មីនេះ ក្រុមការងារតាមវិស័យខាងរដ្ឋាភិបាលសម្រាប់ធ្វើជាដៃគូពិភាក្សាការងារជាមួយវិស័យឯកជន មានការផ្លាស់ប្តូរច្រើន ជាពិសេសរដ្ឋមន្ត្រីដែលទទួលបន្ទុក ខណៈក្រុមការងារផ្នែកឯកជនទាំង១៤ ដែលធ្វើការងារជាមួយរដ្ឋាភិបាល ក៏មានការដោះដូរមួយចំនួនផងដែរ។
ក្រុមការងារ«ក» ដែលទទួលបន្ទុកលើផ្នែកកសិកម្ម កសិ-ឧស្សាហកម្ម មានលោក ម៉ុង ឬទ្ធី ជាសហប្រធាន រួមជាមួយរដ្ឋមន្ត្រីកសិកម្ម រុក្ខា ប្រមាញ់ និងនេសាទ លោក ឌិត ទីណា។ ក្នុងក្រុមការងារនេះ តំណាងឯកជន មានអនុប្រធាន៦រូប គឺលោក ផែ ហុកឈួន, លោក ហ៊ុន ឡាក់, លោក សុខ ឆេង, លោក អាន ម៉ាឌី, លោក ភូ វាសនា និងលោក ម៉ែន សុភក្តិ រួមជាមួយសមាជិក២៣រូប។
ផ្នែកទេសចរណ៍ ដែលស្ថិតក្នុងក្រុមការងារ «ខ» មានលោក លូ ម៉េង ប្រធានសហព័ន្ធទេសចរណ៍កម្ពុជា ជាសហប្រធានជាមួយរដ្ឋមន្ត្រីក្រសួងទេសចរណ៍ លោក សុខ សូកេន។ ក្នុងវិស័យឯកជន លោក ឌិន សុមេធារិទ្ធ, លោកស្រី ឆាយ ស៊ាវលីន, លោក ឡាយ គីមសួរ និងលោកស្រី ស្រ៊ាត មុំសោភា ជាអនុប្រធាន ហើយ៣៥រូបទៀតជាសមាជិក។
ក្រុមការងារ«គ» ដែលទទួលខុសត្រូវផ្នែកកម្មន្តសាល សហគ្រាសធុនតូច និងមធ្យម និងសេវា មានលោក តែ តាំងប៉រ ប្រធានសហព័ន្ធសមាគមសហគ្រាសធុនតូច និងមធ្យមកម្ពុជា(FASMEC) ធ្វើជាសហប្រធានរួមជាមួយលោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ ខាងឯកជន មានអនុប្រធាន៤រូប គឺលោក សុខ ស្រស់, លោកស្រី កែវ មុំ, លោក តាំង គួង, លោក ហេង វុទ្ធី និងសមាជិក២៥រូប។
ផ្នែកនីតិកម្ម ពន្ធដារ និងអភិបាលកិច្ច ដែលជាក្រុមការងារ «ឃ»។ លោក អានូដ ដាក (Arnaud Darc) ធ្វើជាសហប្រធានជាមួយលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។ កាលពីវេទិកាលើកទី១៨ នាឆ្នាំ២០១៩ សហប្រធានវិស័យឯកជន គឺលោក ប្រេដតុន ស្ការ៉ូនី។ ក្រុមការងារនេះ មានលោក សុខ ពិសិដ្ឋ, លោក តាន់ មុនីវណ្ណ លោ គួច ផេង ជាអនុប្រធាន និងសមាជិកចំនួន៥៧នាក់។
សម្រាប់ក្រុមការងារ«ង» ផ្នែកសេវាធនាគារ និងហិរញ្ញវត្ថុ លោក អ៊ិន ចាន់នី ប្រធានអគ្គនាយកធនាគារ អេស៊ីដា បន្តធ្វើសហប្រធានផ្នែកឯកជន រីឯលោកស្រី ជា សិរី ទេសាភិបាលធនាគារជាតិនៃកម្ពុជា ជាសហប្រធានផ្នែករដ្ឋាភិបាល។ វិស័យឯកជន មានអនុប្រធាន៦រូប គឺលោក វ៉ាន់ ឆារស៍ជួន, លោក លឹម សុជាតិ, លោក គា បូរាណ, លោក ប៊ុន យីន, លោក ហោ ប៊ុនថៃ, លោក ឈុន វឌ្ឍនភក្តី និងសមាជិក៣៦រូប។
ផ្នែកដឹកជញ្ជូន និងហេដ្ឋារចនាសម្ព័ន្ធ ដែលជាក្រុមការងារ «ច» មានលោក សូ ងួន ម្ចាស់ក្រុមហ៊ុន សូ ងួន គ្រុប ជាសហប្រធាន ជាមួយលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន។ ក្រុមការងារនេះ មានអនុប្រធាន៦រូប គឺលោក វិញ ហួរ, លោក ហ៊ី បាវី, លោក គួច ផេង, លោក គុជ ស៊ីនិត, លោក ស៊ិន ចន្ធី, លោក ទី ពិសិដ្ឋ និងសមាជិក៣១រូប ពីវិស័យឯកជន។
ក្រុមការងារ «ឆ» ទទួលខុសត្រូវផ្នែកផលិតកម្មកែច្នៃសម្រាប់នាំចេញ និងកិច្ចសម្រួលពាណិជ្ជកម្ម ដោយលោក គួច ផេង ជាសហប្រធានជាមួយលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម។ កាលពីវេទិកាឆ្នាំ២០១៩ លោក វ៉ាន់ ស៊ូអៀង ជាសហប្រធានខាងវិស័យឯកជន។ ខាងឯកជន មានអនុប្រធាន៥រូប គឺលោក តាន់ មុនីវណ្ណ,លោក លី ឃុនថៃ, លោក គង់ សាង, លោក លឹម តុង, លោកស្រី ចាន់ សុទ្ធា និងសមាជិក៣៤រូប។
ផ្នែកទំនាក់ទំនងវិជ្ជាជីវៈ ជាបន្ទុករបស់ក្រុមការងារ«ជ» ដែលមានលោក ណាង សុធី អនុប្រធានតំណាងអង្គការវិជ្ជាជីវៈរបស់និយោជក ជាសហប្រធានជាមួយលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។ ក្រុមការងារនេះ មានអនុប្រធាន៤នាក់ គឺលោក សុខ ពិសិដ្ឋ, លោក គង់ សាង, លោកស្រី អ៊ឹង ស៊ាងរិទ្ធី, លោក ឡី សុភាព និងសមាជិក៣១នាក់ពីវិស័យឯកជន។
ក្រុមការងារ«ឈ» ផ្នែកស្រូវ-អង្ករ មានលោក ចាន់ សុឃាំង ប្រធានសហព័ន្ធស្រូវ-អង្ករកម្ពុជា ជាសហប្រធាន ដែលមានលោក ហ៊ុន ឡាក់ លោក សុង សារ៉ន លោក ភូ វាសនា លោក គឹម សាវុធ និងលោក យន់ ហុង ជាអនុប្រធាន។ សហប្រធានខាងរដ្ឋាភិបាល គឺលោក ឌិត ទីណា រដ្ឋមន្ត្រីក្រសួងកសិកម្ម ខណៈកាលពីវេទិកាលើកទី១៨ លោក សុខ ពុទ្ធីវុធ ជាសហប្រធានខាងវិស័យឯកជន។ សមាជិកពីខាងវិស័យឯកជនមាន៣៣នាក់។
ក្រុមការងារ«ញ» ទទួលបន្ទុកផ្នែកថាមពល និងធនធានរ៉ែ ដោយមានលោក អ៊ុន យុទ្ធី ប្រធានសមាគមអ្នកផ្គត់ផ្គង់ទឹកស្អាតកម្ពុជា ជាសហប្រធាន ខាងវិស័យឯកជន។ អនុប្រធាន៤រូប គឺលោក ឈាង សុធី, លោក វិញ ហ៊ួរ, លោក គួច ផេង និងលោក ឡេង ឫទ្ធី រួមជាមួយសមាជិក២២នាក់ទៀត។
ផ្នែកអប់រំ ដែលជាក្រុមការងារ «ដ» មានលោក ហេង វ៉ាន់ដា សាកលវិទ្យាធិការ នៃវិទ្យាស្ថានវ៉ាន់ដា ជាសហប្រធាន ជាមួយលោកឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។ ខាងឯកជន មានលោក ប៉ិច បូឡែន លោក គួច ម៉េងលី លោក ស៊ាង សុបញ្ញា និងលោក អោម សេងបូរ៉ា ជាអនុប្រធាន អមដោយសមាជិក២៧នាក់។
ក្រុមការងារ«ឋ» ដែលជាផ្នែកសុខាភិបាល មានវេជ្ជបណ្ឌិត តាន់ គឹមម៉េង ជាសហប្រធាន រួមជាមួយរដ្ឋមន្ត្រីក្រសួងសុខាភិបាល លោក ឈាង រ៉ា។ លោក ណាង សុធី, លោក ជិន សំណាង, លោក ជា ចាន់ឌី និងលោក គួច ម៉េងលី ជាអនុប្រធានពីវិស័យឯកជន អមដោយសមាជិក២២នាក់ទៀត។
ក្រុមការងារ«ឌ» ផ្នែកសំណង់ និងអចលនទ្រព្យឯណោះវិញ លោក តាន់ មុនីវណ្ណ អនុប្រធានសភាពាណិជ្ជកម្ម ជាសហប្រធានខាងវិស័យឯកជន ដោយកន្លងមក គឺលោក លី ហួរ។ ក្រុមការងារនេះ មានលោក លឹម សុជាតិ, លោក ថៃ ជាហ៊ួត, លោក វ៉ាន់ ឆារស៍ជួន និងលោក សៀ ឫទ្ធី ជាអនុប្រធាន រួមទាំងសមាជិក៥៦នាក់ពីវិស័យឯកជន។
ចុងក្រោយ គឺក្រុមការងារ«ឍ» ដែលទើបតែបង្កើតថ្មី ដោយទទួលបន្ទុកផ្នែកសេវាហិរញ្ញវត្ថុមិនមែនធនាគារ។ ខាងវិស័យឯកជន លោក គិត ម៉េង ប្រធានសភាពាណិជ្ជកម្មកម្ពុជា ជាសហប្រធាន ដោយមានអនុប្រធាន៤រូប គឺលោក លឹម សុជាតិ, លោក គួច ផេង, លោក ណាង សុធី និងលោក ហេង វ៉ាន់ដា ខណៈសមាជិកមានដល់ទៅ៥៤រូប។
សមាសភាពនៃក្រុមការងារទាំង១៤ខាងលើ នឹងត្រូវបញ្ចប់អាណត្តិរបស់ខ្លួននៅពេលសហប្រធានថ្មីចូលជំនួស តាមរយៈការជ្រើសរើសស្របតាមនីតិវិធីកំណត់របស់សភាពាណិជ្ជកម្មកម្ពុជា។ សេចក្តីសម្រេចរបស់សម្តេចនាយករដ្ឋមន្ត្រីបានបញ្ជាក់ថា៖ « សហប្រធាន និងសមាជិក នៃក្រុមការងារនីមួយៗ ត្រូវពិភាក្សាក្នុងក្រុមការងារ ដើម្បីប្រមូលផ្តុំនូវរាល់បញ្ហាដែលមានចរឹតជាគន្លឹះ សម្រាប់លើកឡើងជាក្រុមការងាររដ្ឋាភិបាលជាដៃគូ ឬសម្រាប់លើកឡើងនៅពេលមានការប្រជុំពេញអង្គរបស់វេទិការាជរដ្ឋាភិបាល-ផ្នែកឯកជន តាមរយៈក្រុមប្រឹក្សាអភិវឌ្ឍន៍កម្ពុជា»។
លើសពីនេះ សហប្រធាន និងសមាជិក នៃក្រុមការងារនីមួយៗ ត្រូវចូលរួមប្រជុំតាមកម្មវិធីកំណត់របស់សហប្រធានក្រុមការងាររបស់រដ្ឋាភិបាល ដើម្បីចូលរួមដោះស្រាយរាល់បញ្ហា ដែលជាកង្វល់ ឬឧបសគ្គរបស់ធុរជនទូទៅ ក្នុងក្របខណ្ឌសមត្ថកិច្ចរបស់ខ្លួន។ សម្តេច ហ៊ុន ម៉ាណែត បានបន្ថែមនៅក្នុងសេដ្ឋកិច្ចសម្រេចរបស់ខ្លួនយ៉ាងដូច្នេះ ៖ « មានតែបញ្ហាដែលមិនអាចដោះស្រាយបាន ក្នុងកម្រិតក្រុមការងារប៉ុណ្ណោះ ដែលអាចត្រៀមសម្រាប់បញ្ចូលក្នុងរបៀបវារៈ នៃការប្រជុំពេញអង្គរបស់វេទិការាជរដ្ឋាភិបាល-ផ្នែកឯកជន នាពេលបន្ទាប់»៕