« យើងកំពុងទន្ទឹងរង់ចាំកិច្ចប្រជុំប្រកបដោយការស្ថាបនា និងការសន្ទនារវាងមេដឹកនាំទាំងពីរនៅ San Francisco ក្នុងខែវិច្ឆិកា។ ខ្ញុំគិតថាខ្ញុំទើបតែបញ្ជាក់រឿងនេះ »។  អ្នកនាំពាក្យសេតវិមាន លោកស្រី Karine Jean-Pierre បានអះអាងបែបនេះថ្ងៃទី ៣១ ខែតុលា។ 

 

ការលើកឡើងរបស់សេតវិមានបានធ្វើឡើងប៉ុន្មានថ្ងៃបន្ទាប់ពីរដ្ឋមន្ត្រីការបរទេសចិនលោក វ៉ាង យី បានធ្វើទស្សនកិច្ចនៅវ៉ាស៊ីនតោន។ ដំណើរទស្សនកិច្ចនេះ ត្រូវបានរំពឹងថា នឹងត្រួសត្រាយផ្លូវសម្រាប់កិច្ចប្រជុំកំពូលរវាងប្រធានាធិបតី ស៊ី ជិនភីង និងប្រធានាធិបតី ចូ បៃឌិន នៅក្រៅសន្និសីទកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC ) នៅ San Francisco អំឡុងខែវិច្ឆិកា។

 

យ៉ាងណាមិញ ចិន ​មិន​ទាន់បាន​បញ្ជាក់​ថា លោក ស៊ី នឹង​មក​អាម៉េរិកនោះ​ទេ។ មន្ត្រីរដ្ឋបាលជាន់ខ្ពស់អាមេរិកម្នាក់ បាននិយាយថា នឹងមានកិច្ចព្រមព្រៀងមួយ ដើម្បីជួបគ្នានៅ San Francisco ក្នុងខែវិច្ឆិកា ហើយកំពុងពិនិត្យមើលព័ត៌មានលម្អិតសំខាន់ៗ ដើម្បីបញ្ចប់ផែនការនោះ ។

 

លោក បៃឌិន និងលោក ស៊ី មិនបានទាក់ទងគ្នា ចាប់តាំងពីកិច្ចប្រជុំនៅកោះបាលី ក្នុងខែវិច្ឆិកា ឆ្នាំ២០២២ ។ ទំនាក់ទំនងរវាងប្រទេសសេដ្ឋកិច្ចឈានមុខគេរបស់ពិភពលោកទាំងពីរ មានភាពតានតឹងអស់រយៈពេលជាច្រើនឆ្នាំ ដោយសារប្រទេសទាំងពីរនេះ ប្រជែងដណ្តើមឥទ្ធិពលនៅក្នុងតំបន់អាស៊ីប៉ាស៊ីហ្វិក ហើយមិនយល់ស្របលើបញ្ហាជាច្រើន។

 

នៅក្នុងព្រឹត្តិការណ៍មួយដែលរៀបចំដោយ Aspen Strategy Group នៅទីក្រុងវ៉ាស៊ីនតោន កាលពីថ្ងៃទី២៨ ខែតុលា លោក វ៉ាង យី បានអះអាងថា ភាគីទាំងពីរនឹងធ្វើឱ្យមានស្ថិរភាព និងឱ្យទំនាក់ទំនងទ្វេភាគីកាន់តែប្រសើរឡើងតាមដែលអាចធ្វើទៅបាន ហើយយល់ព្រមធ្វើការរួមគ្នា ដើម្បីឆ្ពោះទៅរកកិច្ចប្រជុំរវាងមេដឹកនាំទាំងពីរ នៅសន្និសីទនៅទីក្រុង San Francisco ។ នេះបើយោងតាមសារព័ត៌មានចិន Xinhua ។

 

​យ៉ាង​ណាមិញ ប្រមុខការទូតចិនរូបនេះ បាន​ព្រមាន​ថា ផ្លូវ​ទៅ​កាន់​ទីក្រុង San Francisco មិន​រលូននោះ​ទេ។ លោកបញ្ជាក់ថា អាម៉េរិក និងចិនត្រូវតែលុបបំបាត់ការជ្រៀតជ្រែក ជម្នះឧបសគ្គ ពង្រឹងការឯកភាពគ្នា ដើម្បីបណ្តុះឲ្យចេញជាលទ្ធផល៕