បច្ចុប្បន្ន បឹងកេត ឈរនៅចំណាត់ថ្នាក់លេខ៤ (បណ្ដោះអាសន្ន)។ បើទោះជាចំណាត់ថ្នាក់លេខ៤ បឹងកេត នៅតែមិនទាន់ធ្វើបានល្អ ព្រោះចាញ់ ២ប្រកួតជាប់គ្នា គឺចាញ់ព្រះខ័នរាជស្វាយរៀង ៣-១ និងចាញ់ អាយ អេស អាយដង្កោសែនជ័យ ២-១។ 
 

នៅសប្ដាហ៍ទី១០នេះ បឹងកេត ត្រូវប្រកួតជាមួយ ភ្នំពេញក្រោន ដែលឈរចំណាត់ថ្នាក់លេខ២ (បណ្ដោះអាសន្ន)។ ជំនួប ៦លើក បន្ទាប់ពីប្ដូឈ្មោះក្រុមហ៊ុនលីគ ទៅជា CPL បឹងកេត ឈ្នះ ភ្នំពេញក្រោន តែម្ដងប៉ុណ្ណោះ ក្រៅពីនោះ ចាញ់៣ និងស្មើ២។ ចំណែកការប្រកួតជុំទី១ ក្នុងពានរង្វាន់លីគកំពូលកម្ពុជា ឆ្នាំ២០២៣-២០២៤ ភ្នំពេញក្រោន បានឈ្នះ បឹងកេត លទ្ធផល ២-១។ 

ការយកឈ្នះភ្នំពេញក្រោន ដូចជាមិនមែនរឿងងាយស្រួលទេ សម្រាប់បឹងកេត ព្រោះក្រុមនេះ កំពុងជោគជ័យយ៉ាងខ្លាំង ទាំងក្នុងការប្រកួតលីគ និង AFC Cup ម្យ៉ាងវិញទៀត ក៏ជាក្រុមការពារតំណែងជើងឯក ឆ្នាំ២០២២ ផងដែរ។
 

តើបឹងកេត ឈ្នះភ្នំពេញក្រោនទេ ឬក៏ត្រូវចាញ់ ៣សប្ដាហ៍ជាប់គ្នា?
 

ក្នុងថ្ងៃជាមួយគ្នានោះ វេលាម៉ោង គិរីវង់សុខសែនជ័យ ត្រូវទទួលក្រុមភ្ញៀវ វិសាខា នៅម៉ោង ៣:៤៥ នៅកីឡដ្ឋានគីរីវង់សុខសែនជ័យ។ ចំណែក ណាហ្គាវើលដ៍ ត្រូវប្រកួតជាមួយ ព្រៃវែង នៅកីឡដ្ឋានខេត្តកំពង់ស្ពឺ វេលាម៉ោង ៦:០០ យប់។
 

ចូលមកដល់ថ្ងៃទី៥ ខែវិច្ឆិកា នៃការប្រកួតពានរង្វាន់លីគកំពូល សប្ដាហ៍ទី១ អង្គរថាយហ្គឺរ ត្រូវស្វាគមន៍ អាយ អេស អាយ ដង្កោសែនជ័យ នៅកីឡដ្ឋានហនុមាន ម៉ោង ៣:៤៥ រសៀល រីឯ ព្រះខ័នរាជ ស្វាយរៀង ទទួល កងយោធពលខេមរភូមិន្ទ ម៉ោង ៦:០០ ល្ងាច នៅកីឡដ្ឋានខេត្តស្វាយរៀង។
 

 គួរបញ្ជាក់ផងដែរថា គិតត្រឹមសប្ដាហ៍ទី៩ ព្រះខ័នរាជ ស្វាយរៀង បន្ដឈរនៅចំណាត់ថ្នាក់លេខ១ (បណ្ដោះអាសន្ន) មាន ២៧ពិន្ទុ។ ចំណាត់ថ្នាក់លេខ ២ ភ្នំពេញក្រោន មាន ២១ពិន្ទុ តាមពីក្រោយដោយ វិសាខា មាន ១៨ពិន្ទុ។ ចំណែកចំណាត់ថ្នាក់លេខ ៤ បឹងកេត មាន ១៣ពិន្ទុ ស្មើគ្នាជាមួយ អាយ អេស អាយ ដង្កោសែនជ័យ ឈរនៅចំណាត់ថ្នាក់លេខ ៥។ រីឯកងយោធពលខេមរភូមិន្ទ លេខ៦ និងព្រៃវែង លេង៧ មាន១០ពិន្ទុ ដូចគ្នា។ ណាហ្គាវើលដ៍ មាន ៩ពិន្ទុ ឈរចំណាត់ថ្នាក់លេខ៨ តាមពីក្រោយដោយគិរីវង់សុខសែនជ័យ លេខ៩ មាន ៥ពិន្ទុ។ ដោយឡែក អង្គរថាយហ្គឺរ ត្រូវធ្លាក់មកលេខ១០ មាន៤ពិន្ទុ៕