មេដាយចំនួន ១៤ ដែលអត្ដពលិកកីឡាវាយថ្នាលរបស់កម្ពុជា រកបានក្នុងព្រឹត្តិការណ៍មានដូចជា មាស១ ប្រាក់៦ និងសំរឹទ្ធ៧។ ប្រធានសហព័ន្ធកីឡាវាយសីកម្ពុជា ចាត់ទុកថាអត្ដពលិកវ័យក្មេងទាំងអស់ កើនឡើងនូវសមត្ថភាពជាខ្លាំង។ លោក លី កុសល បន្ថែមទៀតថា ក្រោមការបង្ហាត់របស់គ្រូបរទេសស្ម័គ្រចិត្ត កីឡាករ-កីឡាការិនី មានវិន័យខ្ពស់ ហើយយកចិត្តទុកហ្វឹកហាត់ជាខ្លាំង។ 
 

«កីឡា ទោះបីជាយើង មិនបានមេដាយមាសក៏ដោយ ហើយបានមេដាយប្រាក់ ក៏ចាត់ទុកថាជាជោគជ័យមួយដ៏ធំ ដោយសារតែនេះ ជាថ្នាល់​ ដែលយើងទើបបណ្ដុះបណ្ដាល ហើយជាឱកាសឲ្យក្មេងៗទាំងអស់នោះ ខិតខំបញ្ចេញអស់ពីសមត្ថភាព ជាមួយអ្វី ដែលពួកគេមាន ដូចជាបច្ចេកទេស ដែលបានរៀនសូត្រ ពីគ្រូបរទេស។ គ្រូពីបរទេស បានស្ម័គ្រចិត្តមកជួយ។ ក្រោមការហ្វឹកហាត់ជាមួយគ្រូដែលមានវិន័យតឹងរឹង បើទោះជាមានរយៈពេលខ្លី ប៉ុន្ដែកីឡាករ-កីឡាការិនីទាំងអស់ មានការយកចិត្តទុកដាក់ និងមានស្មារតីដើម្បីជាតិ។»។ លោក លី កុសល បាននិយាយដូច្នេះ។
 

ការប្រកួតកីឡាវាយសីជើងឯកយុវជនអាស៊ីអាគ្នេយ៍ (BA Sea Regional Junior Championship) ឆ្នាំ២០២៣ មាន ៥ប្រទេសចូលរួម ក្នុងនោះមាន ម្ចាស់ផ្ទះ កម្ពុជា, ប៊្រុយណេ, ឡាវ, មីយ៉ាន់ម៉ា និងទីម័រខាងកើត​ ហើយអត្ដពលិកថ្នាលសរុប ៧០នាក់។
 

គួរបញ្ជាក់ថា បន្ទាប់ពីចប់ការប្រកួត ដែលប្រព្រឹត្តទៅរយៈពេល ៥ថ្ងៃនេះ មីយ៉ាន់ម៉ា ឈរចំណាត់ថ្នាក់លេខ១ ឈ្នះមេដាយសរុប១៧ ក្នុងនោះមាស១១ ប្រាក់៤ និងសំរឹទ្ធ២ តាមពីក្រោយដោយកម្ពុជា មេដាយសរុប១៤ មាស១ ប្រាក់៦ និងសំរឹទ្ធ៧ និងលេខ៣ ទីម័រខាងកើត មេដាយសរុប១០ ប្រាក់១ សំរឹទ្ធ៩។ ចំណែកលេខ៤ ឡាវ ឈ្នះមេដាយសរុប៣ ប្រាក់១ និងសំរឹទ្ធ២៕