ផែនការផ្ទេរការដឹកនាំសិង្ហបុរីពីក្បាលម៉ាស៊ីនជំនាន់ទី៣ ទៅអ្នកជំនាន់ទី៤ របស់បក្សសកម្មភាពប្រជាជន (PAP) ដែលកំពុងកាន់អំណាច ទំនងគ្មានអ្វីប្រែប្រួលទៀតឡើយ ហើយអាចដំណើរការតាមការរំពឹងទុក។ លោក លី សៀនឡុង នាយករដ្ឋមន្ត្រីសិង្ហបុរី និងជាអគ្គលេខាធិការបក្ស PAP ប្រាប់សមាជិកបក្សថា លោកនឹងផ្ទេរការដឹកនាំប្រទេសទៅឱ្យឧបនាយករដ្ឋមន្រ្តី ឡរ៉េន វង់ នៅមុនការបោះឆ្នោតទូទៅឆ្នាំ២០២៥។

 

តាមពិតទៅ ផែនការផ្ទេរតំណែងនេះ ត្រូវបានរៀបចំយូរមកហើយ ដែលធ្វើតាមទម្លាប់នៃការប្រគល់អំណាចតាមជំនាន់ដឹកនាំមុនៗមក ប៉ុន្តែត្រូវបានអាក់ខានដោយបញ្ហាជាច្រើន ពិសេសចុងក្រោយការផ្ទុះជំងឺកូវីដ-១៩ តែម្ដង។។ លោក វង់ ត្រូវបានជ្រើសរើសដោយក្រុមមន្រ្តីជំនាន់ទី៤ សម្រាប់ការស្នងតំណែងនេះ។ ដូចនេះ លោក វង់ ទំនងដឹកនាំបក្ស PAP ដើម្បីប្រជែងការបោះឆ្នោតសភាខាងមុខដោយមិនចាំបាច់រង់ចាំឡើយ។

 

នាសន្និបាតថ្ងៃទី៥ ខែវិច្ឆិកា លោក លី ដែលពន្យារពេលចូលនិវត្តន៍ម្ដងហើយ និយាយថា ប្រសិនបើផែនការដំណើការរលូន លោកនឹងផ្ទេរតំណែងឱ្យក្រុមមន្រ្តីវ័យក្មេងនៅខួបកំណើតទី៧០ របស់បក្សនៅខែវិច្ឆិកា ឆ្នាំ២០២៤ ។

 

កូនប្រុសស្ថាបនិកសិង្ហបុរី លី ក្វាន់យូ អះអាងថា​ លោក វង់ និងមន្រ្តីជំនាន់ទី៤ សុទ្ធតែបានបំពេញការងារច្រើនឆ្នាំ ជាមួយការទទួលខុសត្រូវកាន់តែធំ ហើយក៏ត្រៀមខ្លួនជាស្រេចដើម្បីកាច់ចង្កូតប្រទេសដែរ។ បើតាមលោក លី លោក វង់ ដែលជារដ្ឋមន្ត្រីហិរញ្ញវត្ថុផងនោះ ប្រាប់លោកថា ខ្លួនត្រៀមរួចហើយសម្រាប់ការងារថ្មី ដូចនេះគ្មានអ្វីដែលត្រូវពន្យារពេលផ្លាស់ប្ដូរអ្នកដឹកនាំឡើយ។

 

ក្រោយចាកចេញពីតំណែង លោក លី ទុកឱ្យលោក វង់ ជាអ្នកសម្រេចថា តើលោកអាចជួយអ្វីបាន ហើយលោកនឹងជួយបក្សសម្រាប់ការបោះឆ្នោតលើកក្រោយ៕