មនុស្សច្រើនជាង ២៤០នាក់ ដោយក្នុងនោះមានជនជាតិអ៊ីស្រាអែល ថៃ និងជនបរទេសផ្សេងទៀត ត្រូវបានក្រុមហាម៉ាស ចាប់ជាចំណាប់ខ្មាំង ចាប់តាំងពីមានការវាយប្រហារនៅថ្ងៃទី៧ ខែតុលា។ ខណៈមានបណ្តាប្រទេសជាច្រើននៅក្នុងតំបន់អំពាវនាវឱ្យមានបទឈប់បាញ់ នាយករដ្ឋមន្រ្តីអ៊ីស្រាអែល លោក បេនចាមីន ណេតាន់យ៉ាហ៊ូ បានលើកឡើងថា ប្រសិនបើគ្មានការរំដោះចំណាប់ខ្មាំងទាំងអស់ កិច្ចព្រមព្រៀងបទឈប់បាញ់មិនអាចធ្វើទៅរួចឡើយ។ 

 

«វានឹងគ្មានបទឈប់បាញ់ ដោយគ្មានការរំដោះចំណាប់ខ្មាំងឡើយ»។ មេដឹកនាំអ៊ីស្រាអែល បានសង្កត់ធ្ងន់បែបនេះ នៅចំពោះមុខកងកម្លាំងអ៊ីស្រាអែល នៅមូលដ្ឋានទ័ពអាកាស Ramon ក្នុងថ្ងៃទី៥ ខែវិច្ឆិកា ដោយបន្តរក្សាជំហររបស់រដ្ឋាភិបាលអ៊ីស្រាអែលចំពោះក្រុមហាម៉ាសដដែល។ 

 

បើតាមលោក ណេតាន់យ៉ាហ៊ូ អ៊ីស្រាអែល បានប្រាប់ប្រទេសជាមិត្តរួចហើយថា កម្លាំងអ៊ីស្រាអែល នឹងបន្តប្រតិបត្តិការរបស់ខ្លួនហើយបន្តរហូតដល់យកឈ្នះលើក្រុមហាម៉ាស។ ចាប់តាំងពីថ្ងៃទី៧ ខែតុលាមក រដ្ឋាភិបាលអ៊ីស្រាអែល បានប្តេជ្ញាតាមប្រមាញ់សមាជិកក្រុមហាម៉ាសឱ្យអស់នៅក្នុងតំបន់កាហ្សា។ នេះបើតាមការចុះផ្សាយរបស់ទីភ្នាក់ងារព័ត៌មាន Reuters។

 

ក្នុងជំនួបជាមួយរដ្ឋមន្រ្តីការបរទេសអាម៉េរិក លោក អាន់តូនី ប្លីងខិន សមភាគីកាតា, អារ៉ាប៊ីសាអូឌីត អេហ្ស៊ីប, ហ្ស៊កដានី និងអេមីរ៉ាតអារ៉ាប់រួម បានទទូចឱ្យអាម៉េរិកបញ្ចុះបញ្ចូលអ៊ីស្រាអែលឱ្យមានបទឈប់បាញ់។ យ៉ាងណាមិញ លោក ប្លីងខិន មិនយល់ស្របលើបញ្ហានោះឡើយ។ 

 

ប្រមុខការទូតអាម៉េរិក បានត្រឹមតែឯកភាពលើការផ្អាកការបាញ់គ្នានៅតំបន់ណាមួយ ដើម្បីអាចដឹកជំនួយមនុស្សធម៌សម្រាប់ប្រជាជនប៉ាឡេស្ទីន នៅតំបន់កាហ្សាភាគខាងត្បូងប៉ុណ្ណោះ។ លោកប្លីងខិនយល់ថា កិច្ចព្រមព្រៀងបទឈប់បាញ់មានតែអនុញ្ញាតឱ្យក្រុមហាម៉ាស ពង្រឹងសមត្ថភាពរបស់ខ្លួនឡើងវិញប៉ុណ្ណោះ។ 

 

ជិតរយៈពេលមួយខែហើយ ជម្លោះអ៊ីស្រាអែល និងហាម៉ាសនៅតែបន្ត ដោយអ៊ីស្រាអែល បានវាយប្រហារលើក្រុមហាម៉ាស តាមរយៈផ្លូវអាកាស ផ្លូវគោក និងផ្លូវទឹក។ យោធាអ៊ីស្រាអែល បានឡោមព័ទ្ធទីក្រុងកាហ្សា រួមទាំងមានការប្រយុទ្ធជាមួយក្រុមហាម៉ាស នៅតំបន់ទីក្រុងផ្សេងផង ក្នុងទឹកដីកាហ្សា។

 

ថ្លែងប្រាប់ទីភ្នាក់ងារព័ត៌មាន Reuters លោក Itamar Yaar អតីតអនុប្រធានក្រុមប្រឹក្សាសន្តិសុខជាតិអ៊ីស្រាអែល​ បានលើកឡើងថា កម្លាំងអ៊ីស្រាអែល មិនបានរងសម្ពាធដូចប្រតិបត្តិការយោធានៅតំបន់កាហ្សាលើកមុនៗឡើយ។ ត្រង់ចំណុចនេះ លោក Yaar បានអះអាងថា ប្រសិនបើអ៊ីស្រាអែល សម្រេចគោលដៅរបស់ខ្លួន ប្រតិបត្តិការយោធាក្នុងតំបន់កាហ្សា អាចនឹងបញ្ចប់ត្រឹមរយៈពេល ៣ ឬ៤សប្តាហ៍ខាងមុខ។ យ៉ាងណាមិញ មន្រ្តីអ៊ីស្រាអែលរូបនេះ មិនបានបញ្ជាក់ឱ្យបានច្បាស់លាស់ឡើយ។ 

 

នៅសប្តាហ៍មុន លោក Abu Ubaida អ្នកនាំពាក្យរបស់កងពលតូច Izz el-Deen al-Qassam នៃក្រុមហាម៉ាស បានបញ្ជាក់ថា ក្រុមសកម្មប្រយុទ្ធរបស់ខ្លួន នឹងដោះលែងចំណាប់ខ្មាំង ប្រសិនបើអ៊ីស្រាអែល ដោះលែងអ្នកទោសជនជាតិប៉ាឡេស្ទីនទាំងអស់។ ត្រង់ចំណុចនេះ អ្នកនាំពាក្យក្រុមហាម៉ាស បានអះអាងថា ក្រុមរបស់ខ្លួនអាចមានកិច្ចចរចាដោយផ្នែកពាក់ព័ន្ធនឹងការដោះលែងចំណាប់ខ្មាំង។ 

 

តាមការវិវឌ្ឍស្ថានការណ៍ចុងក្រោយ អាម៉េរិក បានបញ្ជូននាវាមុជទឹកដើរដោយថាមពលនុយក្លេអ៊ែរ និងអាចបំពាក់ក្បាលគ្រាប់នុយក្លេអ៊ែរទៅក្នុងតំបន់ ក្រោយបញ្ជូននាវាដឹកយន្តហោះចម្បាំងចំនួន ២គ្រឿង ទៅសមុទ្រមីឌីទែរ៉ាណេខាងកើត សមុទ្រក្រហម និងឈូងសមុទ្រពែក្សជាដើម៕