ជាតិ
នយោបាយជាតិ
លោក រ៉ុង ឈុន ប្រកាសចេញពីបក្សភ្លើងទៀន ទៅចូលបក្សកម្លាំងជាតិ លោក រ៉ុង ឈុន អតីតអនុប្រធានបក្សភ្លើងទៀន(អ្នកអង្គុយកណ្ដាល)។
× ភ្នំពេញ៖ លោក រ៉ុង ឈុន អនុប្រធានបក្សភ្លើងទៀន ប្រកាសលាឈប់ ហើយទៅចូលរួមជីវភាពនយោបាយជាមួយបក្សកម្លាំងជាតិវិញ។ ការចាកចេញនេះ លោកអះអាងថា មិនមែនជម្លោះផ្ទៃក្នុងឡើយ តែជាគោលដៅបន្តដំណើរប្រជាធិបតេយ្យ សម្រាប់ការបោះឆ្នោតនៅឆ្នាំ២០២៧-២០២៨។
ក្នុងសន្និសីទកាសែត ដែលរៀបចំឡើងនាទីស្នាក់ការសមាគមគ្រូបង្រៀនឯករាជ្យ ថ្ងៃទី៩វិច្ឆិកា លោក រ៉ុង ឈុន បានបញ្ជាក់ថា មូលហេតុនៃការចាកចេញនេះ ដោយសារបក្សភ្លើងទៀន ដែលជាបក្សមូលដ្ឋានអ្នកប្រជាធិបតេយ្យ មិនអាចចូលរួមបោះឆ្នោតនានា នៅពេលខាងមុខបាន ព្រោះតែបញ្ហាបាត់លិខិតចុះបញ្ជីបក្ស។ ដូច្នេះ ទើបលោកសម្រេចបន្តចរន្តនយោបាយ ហើយនាំគោលជំហរដើមនៃបក្សភ្លើងទៀន ទៅចូលរួមជាមួយបក្សកម្លាំជាតិខ្មែរ ដែលទើបបង្កើតថ្មី។
«ខ្ញុំមើលឃើញថា មានតែគណបក្សកម្លាំងជាតិមួយគត់ ដែលមានទស្សននយោបាយ ឆន្ទៈ ព្រមទាំងគោលដៅ មានភាពច្បាប់លាស់ ជាអ្នកបន្តនិងរក្សាបាននូវស្មារតីដើមរបស់ គណបក្សភ្លើងទៀន ដោយពិតប្រាកដ និងឥតងាករេ»។ លោក រ៉ុង ឈុន លើកឡើងបែបនេះ ហើយអះអាងថា មិនមានជម្លោះផ្ទៃក្នុងបក្សភ្លើងទៀនឡើយ ជុំវិញដំណើរចាកចេញរបស់លោក។
ការចូលទៅបក្សកម្លាំងជាតិរបស់ លោក រ៉ុង ឈុន នេះ លោក ស៊ុន ចន្ធី ប្រធានបក្សកម្លាំងជាតិ បានបញ្ជាក់ប្រាប់សារព័ត៌មានថ្មីៗតាមប្រព័ន្ធទូរស័ព្ទថា បក្សរីករាយទទួលស្វាគមន៍ចំពោះ លោក រ៉ុង ឈុន ។ ប្រធានបក្សកម្លាំងជាតិរូបនេះ នឹងរៀបចំប្រជុំសមាជមួយ នៅខេត្តកំពង់ធំ នាថ្ងៃទី១២ វិច្ឆិកា ដើម្បីបោះឆ្នោតផ្ដល់សេចក្ដីទុកចិត្ត លើសមាសភាពប្រធាន អនុប្រធាន ,គណៈកម្មការនាយក , គណៈកម្មការអចិន្ត្រៃយ៍ និងទិសដៅរបស់គណបក្ស ដើម្បីត្រៀមខ្លួនបោះឆ្នោតឆ្នាំ២០២៧-២០២៨។
ទាក់ទិននឹងការបោះឆ្នោតនេះ លោក រ៉ុង ឈុន ក៏បានបញ្ជាក់ក្នុងសន្និសីទដែរថា គោលដៅចម្បង ដែលលោកឈានទៅចូលរួមជាមួយបក្សកម្លាំងជាតិ គឺដើម្បីការបោះឆ្នោតឆ្នាំ២០២៧-២០២៨៕
© រក្សាសិទ្ធិដោយ thmeythmey.com